«Слово» – 24-тя неділя по Сошетствії Святого Духа – неділя, 9.00 год.

0

Днешнє Євангеліє указує нам на дві події, в котрых діє сила Хрістового божества. Выздравліня жены терплячой на кровотечіня і воскресіня Яіровой дівкы.

Яір быв началником сінаґоґы, мав дванадцятьрічну дівку, котра умерала, приходить просити Ісуса о вылічіня. Ісус встав і ішов за ним. По дорозі, кідь многый народ наслідовав Ісуса, притисковав з каждого боку, єдна жена терпляча на кровотечіня, приступила одзаду і з віров дотулила ся края його облечіня. І такой была вылічена, хоць перед выдала на лікарів цілый маєток, а без хосна. Но Ісус ся заставив і повів, хто ся мене дотулив, бо із мене вышла сила? Ученикы і народ чудують ся такій реакції Ісуса, тадь кажду секунду ся го дахто дотуляв, або ліпше повісти притисковав. Но Ісус хотів выявити їй велику віру, бо она на розділ од іншых ся дотулила з віров, не лем притисковала. Зато была вылічена. А тыж жебы дати посилу про Яіра, котрому як раз повіли, же його дівочка уж умерла. А так Ісус говорить жені: не бій ся, твоя віра в то, же я мам міць тото зробити, тя вылічіла. А Яірови зясь: Не бій ся, лем вірь і буде здорова. І іде до дому Яіра і воскрешать його дівочку із мертвых.

Ісус указує, же мать владу над хворотов і смертьов. Він є тот самый. Робить тото і днесь. Хоць ся го не можеме дотулити прямо як тота жена, але можеме ся го з віров дотуляти через святы іконы, крест і тыж через Евхарістїю, де нам дає ся під способом хліба і вина. Приступуйме ку Хрістови з віров як тота жена, жебы сьме могли од Нього і мы учути: Не бій ся, твоя віра тя сохранила, ідь в покою. Слава Ісусу Хрісту!

В неділю, 19. новембра 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. новембра о 15.00, 20.00 год. і 20. новембра  o 2.00 год. за русиньскым часом.

Фото: Ілія Рєпін – Воскресіня дівкы Яіра, 1871. Жрідло: Wikipedia.

Share.

О авторі

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.