Голосник

«Слово» – 25-та неділя по Сошествії Святого Духа – неділя о важности Божого слова в нашім жывоті, 9.00 год.

0
Ку Ісусови приходить єден чоловік, быв законознательом. Приходить з опросом. На першый погляд бы сме повіли, же мудро роздумує. Звідує ся: Што має робити, жебы набыв вічный жывот?

Но Євангеліста додавать: приходить го покушати. Він не ішов по одповідь, але поїмати Ісуса на слові. Чекав, же му Ісус повість дотримовати дашто нове, даяку нову заповідь, тым бы го міг обвинити в погорджованю законом Мойсея. Прото Ісус знаючі о тім, што было в його сердці, не давать йому одповідь прямо, але опросом: Што написано в законі, як там чіташ? А він повів о двох заповідях: Будеш любити Бога і свойого ближнього. На што му Ісус повів: Так роб і будеш жыти. А тот законознатель хотів ся оправдати і просить ся, хто є мій ближній? На што му Ісус одповідать прикладом о чоловікови, котрый впав до рук розбійників і милосерднім самарянови, котрый йому поміг. А наконець додав: Роб і ты так само. Днешнє слово нам говорить о важности Божого слова. Выбраный народ, як выходив із Еґіпта, быв провадженый через день хмаров – дымовым стовпом, а вночі огняным стовпом. І про нас є Боже слово такым огняным стовпом, котрый указує нам дорогу, як перейти тым жывотом, жебы дойти до обіцяной землі – небесного обыстя, подобно як выбраный народ быв ведженый до обіцяной землі – Палестіны. І про нас є важне дати ся вести тым світлом, жебы не збити ся із той дорогы. Най каждый день не перейде без того, жебы сьме взяли до рук Боже слово, а його чітали, і провадили до жывота, дали ся ним вести. Ісус давать ясный знак про тых, што хотять быти його учениками, його наслідовати. Кідь перебудете у мі а мої слова у вас, будете справды моїма учениками. Познате правду і правда Вас ослободить. Мы много раз не знаме, як зареаґовати в тім антіхрістіаньскім, лібералнім світі. Як ся орьєнтовати в тых наглядах, котры ся на нас валять із каждой стороны. І нам Ісус говорить: Што написане в законі? То є В моїм слові, як там чіташ. А найдеме одповідь. А тогды учуєме у своїм внутрі: Так роб а будеш жыти. Слава Ісусу Хрісту!

В неділю, 18. новембра 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 18. новембра 15.00 о 20.00 год. і 12. новембра о 2.00, год. за русиньскым часом.

Фото: Тераєвенгеліє, тлумачіня до русиньского языка, выдане Світовым Конґресом Русинів

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Коментар