«Слово» – Квітна неділя – неділя, 9.00 год.
В Пятніцю 6-тыждня посту на Літурґії оперед посвячены дарів співаме такы слова: Душеполезную совершивше четыредесятницу, котры нам говорять, же з Божов благодатьов сьме закінчіли Святу штиридцятніцю і перед нами є Страстный тыждень. Но іщі перед вступом до Страстного тыждня в нашім літурґічнім календарю находиме Лазарову суботу і Квітну неділю.
Ісус, кідь творив даякы чудесны діла, наказовав, жебы ся о тім нихто не дізнав. Уникав од світьской славы. А на Квітну неділю видиме, же кідь сходить із Оливной горы до Єрусалима, народы го прославляють, а Ісус на тото не реаґує, не сперать їм. Кідь Ісус воскресив Лазаря, котрый быв уж шитири дні в гробі, посходило ся множество Жыдів. І кідьже ся ближыв праздник Пасхы, і зо вшыткых сторон ся Жыде сходили до Єрусалима, свідкове їм говорили о тім чудеснім ділі, і так Ісуса стрічають з великов славов. Но їх думаня є земне. Очекують земного царя, котрый обновить Ізарїльске царьство, выжене Римлянів, і зацарює в Єрусалимі. Думають собі, такый чудотворець, котрый і воскрешать із мертвых, не буде мати проблем ани з Римскым войском. Но Ісус приходить з іншыма думками. Приходить на ослятку, што сімболізує поганьскы народы, котры пришов тыж покорити своїй владі, но не силов, а понижіньом, покоров, любвов. Його вход до Єрусалима є уж предпразденством його побіды, но не земной, а побіды духовной – над гріхом, смертьов, діяволом. Прото доволює, жебы люде го прославляли, бо його входжіня є передзвістьов його воскресіня, і всеобщого воскресіня, што указав на воскресіню Лазаря. Люди кричать Осана, благословеный приходячій в імя Господне, но о пару днів тоты самы люди будуть в злобі кричати: на крест, роспний Його! Бо людьска земна слава є скоро поминаюча.
Днешня Неділя і нас позывать прияти Хріста, але не лем втогды, кідь маме із того выгоду. Але за каждой сітуації голосити ся ку ньому, ці нам із того плинуть якысь выгоду, або то значіть зношати утискованя, пронаслідованя, погорджіня. Жебы сьме вєдно з Ним мали участь і на Його побіді.
Слава Ісусу Хрісту!
В неділю, 1. апріля 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 1. апріля о 15.00, 20.00 год. і 2. апріля о 2.00, год. за русиньскым часом.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Фото: Вход до Єрусалима . Жрідло: Wikipedia.
Повязаны дописы
