Голосник

Собор ПАПЦ рішыл про збіркы на храмы в Ґорлицях і Розділю

0

6. марця 2018 р. в Варшаві проходило засіданя Собору Єпископів Польской Автокефальной Православной Церкви, на котрым были рішены так зовнішны, як і внутрнішні церковны справы. Серед постанов нашли ся і рішыня про митрополитальны збіркы грошів для поєдных храмів і з Лемковины.

Собор Єпископів традицийно як каждий рік оголосил список православных храмів, на якы протягом рока будут збераны фонды на реставраторскы роботы. Серед вытипуваных до тогорічной митрополитальной збіркы сут два храмы, входячы в перемышльско-ґорлицку єпархію. То катедральна церков св. Тройці в Ґорлицях та церков Рождества Пресвятой Богородиці в Розділю.

Збірка на катедральний храм в Ґорлицях буде проведена в червци/юнію т.р. О два місяці пізнійше, в серпни/авґусті, грошы збераны будут на ремонт церкви в Розділю. Грошы будут переданы вызначеным парохіям на споможыня ремонтовых прац. Окрем выміненых двох храмів, в інчых частях Польщы і в другых місяцях будут збераны грошы на дальшы парохіі.

Дальшы і детальны постановы марцьового засіданя Собору ПАПЦ найдете на офіцияльным сайті Церкви.

фот. границі єпархій ПАПЦ

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар