Голосник

Сойм покликал Комісию Нацийональных і Етнічных Меншын

Вчера, 13. листопада/новембра 2019 р., Сойм Польской Республикы покликал єдну з постійных комісий – Комісию Нацийональных та Етнічных Меншын. Єст то єдна з тзв. постійных соймовых комісий, котра мат за задачу занимати ся справами звязаныма з підтримуваньом культуровой спадковины нацийональных і етнічных меншын, якы сут вызнаны польскым законодавством.

За реґуляміном Сойму того рода постійны комісиі сут покликуваны до розсмотрюваня і рыхтуваня тем, котры будут процедуваны через Сойм, ци выражаня опіній в деякых справах, переказуваных під іх обрады через Сойм, Маршалка або Президию Сойму. Постійны комісиі покликуваны сут тіж до триманя соймовой контролі в обшыри, яку надає ім Конституция і інчы законы. Особовый склад поєдных комісий єст выбераный через Сойм на внесок Президиі по отриманю опініі Конвенту Сеньорів. Перше засіданя комісиі покликує і веде Маршалок Сойму. На ним комісия выберат президию.

Комісию Нацийональных і Етнічных Меншын Сойм ІХ каденциі (2019-2023 рр.) выбрал як раз 13. листопада/новембра 2019 р. В єй складі нашло ся 16 посланців. Найвеце з них єст з партиі Право і Справедливіст (7 осіб), 5 членів з Гражданьской Коаліциі, двох з Лівиці, 1 посланец з Польского Народного Сторонництва – Кукіз’15 та єден незалежный посол – Ришард Ґалля, представник німецкой меншыны. На соймовым сайті Комісиі находит ся єй полный склад, інформациі про проведены працы і засіданя. Находит ся гын і закладка, через котру каждый може выслати лист до Комісиі.

Серед членів єст м.ін. Моніка Роса, посланкыня Гражданьской Коаліциі, котра в квітни/апрілю 2017 р. взяла участ в лемківскых упамятнінях акциі «Вісла». Роса, як посланкыня зо Шлеска, брала участ в одкрытю лемківского памятника в місци бывшого комуністичного лаґру в Явожні. Мала товды промову, в котрій высловила свою солідарніст з лемківском памятю.

Згідно з реґуляміном Комісия Нацийональных і Етнічных Меншын мат занимати ся справами, што мают за ціль покріпляти культуру і достоменніст меншын, занимати ся іх етніхныма і языковыма вопросами, як тіж охороном іх меншыновых прав. Комісия діє для рівного трактуваня осіб, без огляду на іх етнічне і расове походжыня ци нацийональніст. Найважнійшый успіх Комісиі по 1989 р. то принятя в 2005 р. уставы про нацийональны і етнічны меншыны та про реґіональный язык, котра списала правны реґуляциі тыкаючы статусу меншын в Польщы.

Соймова Комісия Нацийональных і Етнічных Меншын то окрема комісия од Спільной Комісиі Уряду і Нацийональных та Етнічных Меншын, яка діє на основі спомянутой уставы з 2005 р. В склад СКУіНЕМ входят представникы уряду влады і репрезентанты поєдных нацийональных і етнічных меншын. На лемківску етнічну меншыну припадают два місця в Спільній Комісиі.

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі