Голосник

Спільне колядуваня в Ґладышові

0
Різдвяны свята ся по правді скінчыли, але не значыт то, же не мож фурт тішыти ся і празднувати. Єдным з проявів святочной радости сут выступы вертепів і спільне колядуваня. Нашы хыжы цілый час годны одвидіти колядникы, а по декотрых храмах орґанізуваны сут концерты коляд.

О подібній формі празднуваня Різдва подумали ґладышівяне. В найблизшу суботу, 12. січня/януара 2019 р., в місцевій грекокатолицкій церкви Вознесіня Господнього пройде спільне колядуваня. Голосити добру новину придут так діти і молодіж з польскых, як і лемківскых родин. Вызвучат коляды в лемківскым і польскым языках.

Стріча буде мала екуменічный вымір. В перегляді колядників возмут участ заєдно вірны православной Церкви, як і обох обрядів католицкой Церкви – грекокатоликы і римокатоликы. Сама ґладышівска святыня є властністю грекокатолицкой парохіі, але хоснуют ю і римокатоликы.

Головным орґанізатором подіі є село Ґладышів на челі з його шолтысом – Мирославом Пелехачом. Христос Раждаєт ся! Шолтыс Ґладышова запрашат слухачів ЛЕМ.фм до грекокатолицкой церкви в Ґладышові […] на великє колядуваня. Выступлят місцевы і замісцевы ґрупы, котры поколядуют так по лемківскы, як і по польскы – повіл про нашу редакцию М. Пелехач.

Подібне колядуваня проходило влони, скликало оно гідне чысло колядничых ґруп і обзераючых. Радийо ЛЕМ.фм являт ся медияльным партнером спільного колядуваня в Ґладышові.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар