Голосник

Співы мого роду перенесены на фебруар

0

В днях 2-го аж 4-го фебруара 2018-го року Русиниска оброда на Словенську вєдно із Вігорлатьскым музейом в Гуменнім, Любовняньскым освітнім центром в Старій Любовні, Пряшівскым самосправным крайом, Матицьов словацьков і селами Чірч, Якубяны, Камюнка і Удол орґанізує 15-ый річник ціслословацького фестівалу дітячіх і дорослых співаків русиньской народной співанкы під назвов Співы мого роду 2017.

Фестівал Співы мого роду шторік звыкнув ся орґнаізовати восени. Із причіны того, же в році 2017 приходили грошы на підпорены проєкты в остатнім кварталі рока, Уряд влады Словацькой републікы позволив перенести події, котры не было із часовых причін мож зорґанізовати до кінця 2017-го рока, на першый квартал рока 2018. І зато Співы мого роду 2017 будуть проходити зачатком фебруара.

Задачов цілословацького фестівалу є выглядавати новы таленты – співаків русиньскых народных співанок і авторьскых співанок і дати їм простор про їх презентацію, себереалізацію і можлвость здобыти новы скушености. Фестівал є двоколовый. Наперед ся в реґіоналных выберовых колах выберають тоты найліпшы, котры пак ідуть на завершальны концерты – ґалаконцерты. Окремы концерты роблять ся про дітей і про дорослых співаків. Фестівал все проходить в іншім русиньскім реґіоні.

Тот рік буде фестівал гостити любовняньска долина. На 2-го фебруара є наперед о 9.00 год. напланованый конкурзный концерт дітячіх співаків в Домі културы в Камюнці. Ґалаконцерт дітячіх інтерпретів буде проходити в тот самый день о 12.00 год. в Културнім домі в Якубянах.

Дорослы ся одпрезентують в неділю 4-го фебруара. Конкурзный концерт зачінать о 13.30 год. в Културнім домі в Чірчі. Співы мого роду 2017 будуть закінчены ґалаконцертом дорослых співаків в тот самый день о 17.00 год. в Културнім дому в селі Удол.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар