Голосник

Стартує літній автобус з Крениці до Бардийова

0
Ближыт ся літній перийод, а враз з ным, як попередніма роками, так і того рока буде обновлене автобусове получыня медже Креницьом а Бардийовом і курортом Бардиівскы Купелі. Автобус буде курсувал в липци/юлию і серпни/авґусті в кажду суботу місяця.

Головном цілю такого получыня являт ся поправа комунікациі медже приграничныма партнерскыма містами, якыма сут Крениця та Бардиів. Автобусовы получыня мают заохотити жытелів та прыбываючых до Крениці туристів поіхати на Словацию і одвидіти прекрасне історичне місто Бардиів, записане в 2000 р. на Листі Світового Дідицтва ЮНЕСКО. Єдночасно, як інформує Уряд Міста і Ґміны в Крениці, жытелі Бардийова будут мати нагоду прити до єдного з найбарже знаных курортных міст в Польщы.

Автобус буде выізджал о 10.00 год. з Крениці з пристанку на ул. Еберса, по дорозі буде ставал в Теличы при деревяным костелі, о год. 10.35 буде в Бардийові, а о год. 10.50 уж в Бардиівскых Купелях. Назад, автобус буде рушал о 15.00 год. (Бардиівскы Купелі), вертаючы до Крениці на 15.50 год. Ціна білету там і назад то 22 зл, або 5 евро.

В цілю отрымня веце інформациі та зарезервуваняі місц для веце як 3 осіб мож дзвонити під номер тел. 00421 907 972 763.

 

Шеруй.

О авторі

Наталія Клинковска

Коментар