Голосник

Стріча омбудсмана з представниками меншыновых орґанізаций

0
13. червця/юнія 2018 р. в Бюрі Омбудсмана Громадяньскых Прав в Польщы прошла друга стріча омбудсмана др. Адама Боднара з представниками орґанізаций репрезентуючых нацийональны і етнічны меншыны.

Тым разом – на попередній стрічы бесідувано о насильстві спричыненым упереджынями, бесіда тыкала проблемiв звязаных з реалізацийом освітовых прав нацийональных і етнічных меншын та соспільности, якы хоснуют реґіональний язык. Такій статус в Польщы має як дотепер лем єден – кашебскій. Обшыр бесіды обнимала вчыня меншынового (ци реґіонального) языка, вчыня в тым языку, а тіж вчыня свойой культуры і істориі.

Участникы стірчы вказали, што правильне фунґуваня систему меншыновой едукациі має сутьове значыня для підтримуваня почутя культуровой достоменности меншыны, в тым знаня языка, серед школярів, якы належат до меншын. Єднак, хоц ґарантує тото 35 арт. 1 і 2 закону Конституциі та рішыня ратифікуваной через Польщу Европейской Карты Реґіональных або Меншыновых Языків, обовязуючы правны реґуляциі та практика в іх хоснуваню в нестарчаючій ступени реалізуют потребы діти і молодежы, котры підлігают меншыновій едукациі.

Представникы меншын звернули увагу м.ін. на неправильний, в іх оціні, спосіб выдаткуваня середків передаваных єдиницям територияльных саморуядів з буджету державы на меншынову едукацию в рамках освітовой загальной субвенциі, брак систему мотивуваня учеників до наукы языка або в языку меншыны та брак комплексовой стратеґіі вчыня языка або в языку меншыны, котра обнимала бы вшыткы етапы вчыня – од предшколя по матуральну клясу.

Вчас стрічы Центр Досліджынь над Упереджынями Варшавского Університету запрезентувал результаты досліджынь, переведіня котрых рекомендувал омбудсман, якы тыкают односин до Жыдів і іх істориі по введіню закону о ІНП.

Фот. rpo.gov.pl

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар