Голосник

Сумар дня на 07. жолтня/октобра 2019 р.

Приносиме вам сумар медияльной ґрупы lem.fm+ на ден 07. жолтня/октобра 2019 р.

Сусанна і Грдза польскым «Мам талант!»

В пятницю, 4 жолтня/октобра, в польскiй едициі телевізийного шов «Мам талaнт!» почути мож было лемківскій язык. Вшытко за справом Сусанны Ярой та ансамблю Грдза, котры запрезентували ся в проґрамі зо свойом аранжацийом лемківской співанкы «Полюбила я Штефана». Жырі было захоплене вокалiстком та ансамбльом, котрых почути буде мож уж неодолга в наступных одтинках проґраму. Вартат спомнути, што в 2010 році ансамбль Грдза был фаворитом словацкых елімінаций до Евровізиі, а в 2016 році разом з Сусанном дішли до фіналу чешско-словацкой едициі «Мам талант!». Послідній альбом ансамблю «Neskrotený» в квітни/апріли того рока занял четверте місце на World Music Charts Europe. Ґрупа выконує русиньскы, словацкы, украіньскы і польскы пісьні.

Заклад Професийной Активности покликаный в Ґладышові

В Ґладышові покликаный буде Заклад Професийной Активности. В минулу середу в Ґладышові была підписана умова помедже Маршалківскым Урядом та фундацийом Іліос. Роботу в Закладі найдут і неполосправны. Робочых місц має быти для сорока люди, в тым найменьше тридцетьох неполносправных осіб. Будут ся занимати еколоґічном ґаздівком в Ждыни. Цілю ґладышівского Закладу єст не лем дати людям роботу, пінязі, але што найважнійше – свідоміст, же сут, же можут быти незалежны. В оферті ґаздівкы мают быти продукты такы як мед, яйця, мясо, поміч «золотой ручкы» та аґротуристика, котра хоснувала бы поміщыня Православного Осередка Милосердя «Елеос». Товды ґаздівка могла бы быти хоснувана як місце для зеленых шкіл, ци кольоній. На тоту мысель поблагословил уж архієпископ перемышльско-ґорлицкій Паісий. Вартіст цілого проєкту то 800 тисячів злотых. Ґладишівскій Заклад Професийной Активности буде єденацетым такым закладом в Малопольщы.

Переможці конкурцу «Малопольскє село 2019»

Уж третій раз Малопольскє Воєвідство зорґанізувало конкурс шолтыств «Малопольскє Село 2019». Головном цілю конкурсу было выріжніти села і іх жытелів активні діючых в обыри піднесіня атракцийности малопольского села. Конкурс «Малопольскє село 2019» ділит ся на три катеґориі: Найкрасше Малопольскє Село, Новаторскє Малопольскє село, та Малопольскє Село в Сіти. Переможцями тогорічной едициі конкурсу остали: Завада, Шынвалд і лемківскій Милик, котрий отримал званя Новаторского Малопольского Села 2019 та 60 тисячів злотых нагороды. В тій самій катеґориі зостала тіж выріжнена Мушынка, котра отримала 20 тисячів злотых нагороды. В сандецкым Ґаліцийскым Місточу выріжніня лавреатам вручыли секретар воєвідства Войцєх Пєх та радный Патрик Віхер.

Конґресово-конференцийный центр в Креници

В креницкій пияльни дебатували о побудуваню в місті конґресово-конференцийного центру. Бургомайстер Кренциі Пьотр Рыба поінформувал, што Крениця є міцно розпознавальным містом на туристичній мапі Польщы, річні продаваных є уж мілийон нічліговых місц, але потенциял не єст іщы докінця хоснуваный. Додал, што сучаный конґресово-конференцийного центр притігал бы великы подіі і, што важне, обышло бы ся без возношыня часовых шатровых конкструкций, як напримір рыхтуваных на Економічный Форум, з причыны утяжливости для жытелів і курортників. Презес Курорту Вєслав Пюро выявил готовіст фірмы до участи в проєкті. Повіл, што місця добры для рекреациі і оддыху сут постеріганы тіж як найліпшы для орґанізациі бізнесовых стріч. Вказал аж і на місце, де такій центр мож бы побудувати – то Стары Мінеральны Купальні, Боровиновы Купальні та Старый Здройовый Дім. В дебаті, в котрій участ брали м.ін. послы на Сойм, дискутувано м.ін. про тото, ци будова мала бы быти фінансуваня з публичных грошы, або може приватныма інвесторами. Вшыткы же были згідны, што центр піднесе атракцийніст курорту.

 

Шеруй.

О авторі

Ленка Стефановска

Коментарі