Голосник

Сумар дня на 14. жолтня/октобра 2019 р.

Приносиме вам сумар медияльной ґрупы ЛЕМ.фм+ на ден 14. жолтня/октобра 2019 р.

Нагорода для Юрия Стариньского

Основатель і ведучый Лемківского Ансамблю Пісні і Танця Кычера з Ліґниці, Юрий Стариньскій, в четвер, 10. жолтня/октобра 2019 р., одобрал з рук президента Ліґниці нагороду ім. Юрґена Ґретшеля – Шлезскє небо. Оцініня было признане за діяльніст і плеканя культуровой спадковины жытелів Нижьного Шлеска. Нагороду передано вчас святочной ґалі, яка проходила в просторах ліґницкой Рыцарской Академіі. На рукы лавреата передал єй президент Міста Ліґниці, Тадеуш Кжаковскій. Вчас подіі на сцені з концертом выступила ведена Стариньскым ліґницка Кычера. Премія під назвом Шлезскє небо Юрґена Гретшеля то оцініня, котре признавне єст за осягніня в обшыри охороны культуровой, материяльной і нематерияльной спадковины Нижнього Шлеска, в тым головно Ліґниці і околиц та за діяльніст для толеранциі, взаімной пошаны, спілпрацы, пошануваня інчых люди і покріпляня меджекульторово діялоґу. Особа, котром названо признавану нагорода, то Юрґен Ґретшель, ліґницкій Німец. По войні його родина не была выселена з Ліґниці. Польскє громадянство было му признане аж в 1971 р. Попри тым надале был під надзором комуністичной безпекы. Был єдным з покріпителів польско-німецкого поєднаня. Вмер в Ліґници в 2016 р.

Новосільскій головный на Варшавскых Торгах Штукы

Вчера закінчыли ся 17. Варшавскы Торгы Штукы, якы прошли в Аркадах Кубицкого Королівского Замку в Варшаві. Од пятниці до неділі каждый міг видіти, а тіж купити діла артистів промуваных веце як шістдесятьома ґалериями штукы, антиквариятами і авкцийныма домами. З выбраныма творцями модерной штукы мож было стрітити ся нажыво. Традицийні Торгам товаришат выставы найвекшых польскых творців. В попередніх едициях были то м.ін. Яцек Мальчевскій, Тадеуш Кантор, Віткаци, Войцєх Фанґор, ци Маґдалена Абакановіч. Того рока Варшавскым Торгам Штукы товаришыла презентация побиваючых авкцийны рекорды образів выдатного лемківского артисты, Юрия Новосільского. В пятницю, одкрытю Торгів і выставы товаришыл тіж выклад др. Кристины Черні п.н. «Медже абстракцийом а фіґурацийом – двоязычніст языка Новосільского». Влони Варшавскы Торгы Штукы одвиділо веце як 9 тисячів люди.

Потягом з Мушыны до Попраду

В Братиславі проходила стріча Желізничной Компаніі Словация, цілю створіня нового гармоноґраму желізничных получынь. В розкладі получынь на наступный рік нашол ся вакацийный потяг Мушына-Попрад Татры-Мушына. Што веце, потяг має быти скомунікуваный з Татряньском Електричком. Буде тіж скороченый час постою потягу на стациі Плавеч – з дванацетьох до двох минут. Тырвают іщы бесіды над усталіньом годин одіздів і приіздів реченого потягу.

І Вапенне буде мало свою видокову вежу

В Вапенным тырват будова видоковой вежы. 24-метрова вежа стане на горі Фердель. При добрій хвили має быти одтамале видно Татры. Вежа меє деревяну конструкцию і видоковый тарас на высокости около 20 метрів. Вежа єст єдным з елементів промоциі найменьшого курорту в Польщы, якым являт ся Вапенне. Пару років тому был там побудуваный Здройовый Дім, огороды-вяты – місця выпочынку з паркінґовом інфраструктуром та фонтанна. В недалекій будучности в Вапенным мают тіж быти побудуваны градирня, амфітеатр і пляцы забав для діти. Будут тіж роверовы стежкы. Першы працы уж ся зачали.

Фот. Архів/Фірма Taтры

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі