Голосник

Сумар дня на 15. жолтня/октобра 2019 р.

Приносиме вам сумар медияльной ґрупы ЛЕМ.фм+ на ден 15. жолтня/октобра 2019 р.

Криниця є місцьом з климатом

11. жолтня/октобра в Бохни вчас обходів Світового Дня Туристы одбыло ся вручыня нагорід першой едицийі Туристичных Скарбів Малопольщы. Конкурс орґанізуваный был через Самоуряд Малопольского Воєвідства разом з Малопольском Туристичном Орґанізацийом i одбыл ся в шестьох катеґориях: Місце з климатом, Найцікавшый туристичный пут, Циклична подія, Унікатова туристична атракция, Выпочынок на селі- аґротуристична ґаздівка і В гостині- ґастрономічный обєкт. Зголошеных было понад 200 кандидатур, з чого лем 18 нагородженых, в тым аж дві звязаны з Креницьом: ІІІ місце для Ґміны Крениця в катеґориі Місце з климатом і ІІ місце для видоковой вежы з дидактичном стежком в коронах дерев в катеґориі Унікатова туристична атракция. Головна нагорода высокости 50.000 зл, уфундувана через Маршалка Малопольского Воєвідства, трафила до ґміны Плесьна, окрем того вшыткы выріжнены были обняты єднорічном промоцийном кампанійом. Вчас ґалі признано тіж нагороды за фотоґрафічный конкурс «Путьом деревняной архітектуры», а ціліст закінчил выступ Ганкы Вуйцяк і Яцка Длуґоша.

В Ожынній підписали догваріня

Представникы Стоваришыня Еврореґіон Карпаты Польща і Еврореґіон Карпаты Пілнічна Словация 7. жолтня/октобра в Осередку Еколоґічной Едукациі в Ожынній підписали деклярацию спілпрацы, котрой цілю є сотворити і підперати трансграничну обшыр під назвом «Низкій Бескід», до котрой по пілнічній страні Карпат входят повіты: ґорлицкій, ясельскій і коросняньскій, а по полудньовій – окресы Свидник, Стропків і Бардиів. Головны заложыня то заряджуваня біолоґічном ріжнорідністю, поправа получынь і доступности, як і розвиток спільного туристичного рынку.

В Польщы выбрали

Предвчером, 13. жолтня/октобра, одбыли ся в Польскій Республиці парляментарны выборы, в котрых участ взяло 61,74% выборців, што значыт, же фреквенция была рекордова – вшыткого голосувало понад 18,5 мілийона люди. Державна Выборча Комісия подала, што найвысшый результат соймовых выборів отримала партия Ярослава Качыньского Право і Справедливіст – 43.59%, што переложыло ся на 235 мандатів, на другым місци была Гражданьска Коаліция, то комітет полученых партий: Гражданьской Плятформы, Новочесной, Ініцятивы Польской і Зеленых, котры достали 27,40%, што переложыло ся на 134 мандаты. До Сойму по штырьох роках неприсутности вертат Лівиця, котру творят Союз Демократичной Лівиці, Лівиця Разом і Весна Роберта Бєдроня – іх сумаричный результат то 12.56%, т.є. 49 мандатів. До Сойму вошло іщы Польскє Народне Сторонництво, отримуючы 8,55% (дає тото 30 мандатів в Соймі), і Конфедерация Свобода і Незалежніст – 6,81% (даючых 11 мандатів). Єден посольскій мандат здобыла Німецка Меншына, котру – як меншыбовый комітет – не обовязувал 5-процентовый выборчый поріг. В выборах до Сенату тіж перемогло Право і Справедливіст, отримуючы 48 мандатів, што при єдномандатовій ординациі не дає більшости тій партиі. Опозицийны партиі тіж достали разом 48 депутатскых місц, зато о розкладі більшости в Сенаті будут рішати нововыбраны незалежны сенаторы.

Уці вернули на Підгаля – осінный редик

В минулу середу, т.є. 10. жолтня/октобра, около 1,5 тис овец з Низкого Бескіду, згідні з традицийом осіннього редику вернуло на Підгаля. Вчас штырідньовой вандрівкы путями з Радоцины до Нового Торгу бачам і югасам товаришыл фотоґраф Кристиян Ківач, котрого знимкы з той подіі можете видіти на його фейсбуковым сайті, з котрого материялы пошерували сме і мы на фейсбуковым фанпейджы радия ЛЕМ.фм, на котрый – кєд хочете дознати ся більше о лемківскых і не лем справах – все просиме. Інформациі найдете і на нашым портали lem.fm, зато до стрічы не лем в радию, але і в нашых другых медиях.

Фот. Кристиян Ківач

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі