Голосник

Сумар дня на 17. вересня/септембра 2019 р.

Приносиме Вам сумар медияльной ґрупы ЛЕМ.фм на ден 17. вересня/септембра 2019 р.

«Лемко он Тур» іщы перед ЛУТ

Орґанізаторы Лемковины Ультра Трейль іщы перед тогорічном едицийом гірского бігу через Низкій Бескід – Лемковину, рішыли зорґанізувати акцию «Лемко он Тур».  З акцийом рушают в Польщу, а перша стріча пройде уж днес о 19.00 год. в Полуднику Зеро, на ул. Вільчій 25 в Варшаві. Дальшы стрічы пройдут 18. вересня/септембра о 19.00 год. в Клюбі Подорожників – Намасте в Катовицях і 26. вересня/септембра о 19.00 год. в Гевре в Кракові. На стрічах будут і специяльны гості, котры пережыли уж сесе і оне на лемківскым пути і поділят ся своіма досвідчынями. Буде тіж нагода побесідувати о ближучій ся 6. едициі Лемковины Ультра Трейль. Орґанізаторы передадут тіж цінны інформациі тыкаючы ся трасы, лоґістикы, выпосажыня, одповідят на звіданя участників стріч і запрезентуют колекцию спортового облечыня і нарядя, напр. лямпок, котры участникы будут мочы самы спрібувати.


На 16. Зъізді Польского Стоваришыня Соспільной Психолоґіі буде і о Лемках

В днях од 20. до 22. вересня/септембра на обшыри Выділу Соспільных Наук Університету Адама Міцкєвича в Познані одбуде ся 16. Зъізд Польского Стоваришыня Соспільной Психолоґіі. Орґанізаторами тогорічной едициі сут Інститут Психолоґіі Університету Адама Міцкєвича та Замісцевый Выділ в Познані Гуманістично-Соспільного Університету СВПС. Вчас конференциі буде много выкладів, симпозий, сесиі індивідуальных выступлінь та дебат, тыкаючых м.ін. достоменности, соспільной приналежности і спільноты. Першого дня конференциі одбуде ся дебата на тему «О досліджынях захованя в психолоґіі – де сме і докаль ідеме?».  Не бракне і темы тыкаючой лемківской меншыны. В послідній ден Конференциі одбуде ся симпозия на тему «Соспільно-психолоґічны і культуровы аспекты языковой жывотности серед етнічных меншын і еміґрантів». О панельовых баданях проєкту Lcure в меншыновых просторах – локальных перспективах і методолоґічных вызванях – повідят Анна Масляна, Йоанна Мариняк та Юстина Маєрска-Шнайдер.


Во Свіднику одсвяткуют 200 років од народжыня Александра Павловича

19. вересня/септембра т.р. мине 200 років од народжыня русиньского народного Будителя, грекокатолицкого священника і поеты Александра Павловича. Маковицкій соловій, бо так называный был Павлович завдякы його поетичній творчости, близко 37 років служыл на парохіі во Свиднику. Там же є похороненый, там має свій памятник і в 2011 р. місто надало му званя почестного жытеля. І тепер Свидник не забыл о Будителю Русинів. В найблизшый четвер пройде симпозия о наголовку «Народови вірный єм был…». Святкуваня 200. річниці од народжыня Будителя зачнут ся рано Св. Літургійом в грекокатолицкій церкви Божой Мудрости, по котрій одслужена буде панихіда коло гробу Александра Павловича. Дальше, участникы підут до просторів Піддукляньской Бібліотекы во Свиднику, котра є орґанізатором святкувань – там же проходила буде симпозия. Буде то сім лекций в двох бльоках. Ріхард Павлович повіст о ґенеалоґіі роду Павловичів, православный священник Петро Савчак одпрезентує Павловича як бойовника, Ярослав Джоґаник представит літературну спадковину поеты, а дальше – Йосиф Лельо буде глядал повязань Будителя зо Свидником. Другій бльок одкрыє предсідатель Русиньской Оброды на Словациі, Мартін Караш, котрый буде бесідувал о Павловичу як нацийональным Будителю Русинів. Будут тіж дальшы прелекциі, а завершыньом подіі буде выголошыня результатів конкурсу «Павловичів літературный Свидник».


Фотоґрафічный конкурс з темом языків меншын

Іщы до 10. жолтня/октобра 2019 р. мож присылати знимкы в фотоґрафічным конкурсі орґанізуваным в рамках проєкту RISE COLING. В конкурсі можут брати участ вшыткы, без віковых ограничынь, особливі молодіж. До выграня професийный, фотоґрафічный наплечник, зовнішній диск 1ТБ та карты памяти. Знимкы мают односити ся до темы языків меншын. Орґанізаторы заохочуют, жебы через фотоґрафіі выразити емоциі звязаны з материньскым, меншыновым языком ци языком, котрый є загороженый. Мож прислати пару знимок до выбраных катеґорий, по єдній до поєдной катеґориі, або по єдній знимці до каждой катеґориі. Катеґориі конкурсу то: Я, Чловек: фотоґрафічны портреты; Моі слова – мій світ; Звукы нашых душ; Натуральні!: фотоґрафічный образ звязків медже чловеком і натуром. Послідня катеґория – Рух. Конкурс орґанізуваный є Варшавскым Університетом. Полный реґулямін і технічны вымаганя, тыкаючы высыланых знимок, находят ся на сайті конкурсу. Результаты конкурсу будут оголошены 25. жолтня/октобра т.р. на конкурсовым сайті. Фотоґрафіі фіналистів і выріжненых вказану будут вчас Тыжня Языковой Ріжнорідности в Варшаві, котрый буде проходил од 27. листопада/новембра до 1. грудня/децембра тр.

Шеруй.

О авторі

Наталія Клинковска

Коментарі