Голосник

Сумар дня на 20. листопада/новембра 2019 р.

Приносиме вам сумар медияльной ґрупы ЛЕМ.фм+ на ден 20. листопада/новембра 2019 р.


О Русинах на пресконференциі в Ужгороді

Микола Бобинец, голова Крайового Общества Підкарпатскых Русинів і член Світовой Рады Русинів за Украіну, скликал в минулу пятницю, 15. листопада/новембра, пресконференцию в Ужгороді на тему вырішыня русиньского проблему на Закарпатю. Діяч звернул увагу, што важном квестийом є плянуваный в Украіні на 2020 рік повселюдный спис, зато што попередній, проведеный в 2001 р. выказал 10 тис. Русинів, хоц подля него і інчых орґанізаций Русинів на Закарпатю є на вельо більше. Бобинец припомнул, што Украіна давно задеклярувала свій напрям до евроінтеґрациі і Русины сут в Европі і в Америці вызнаны як окрема нацийональніст, зато за його думками вызнаня нацийональности Русин буде єдным з вымогів вступу Украіны до Европеской Уніі. Русиньскій діяч зреферувал, як выглядат ситуация Русинів в інчых державах. Подля Бобинця в Закарпатскій Области Украіны діют три основны русиньскы орґанізациі, сут то: його Крайове Общество Підкарпатскых Русинів, Закарпатскє Областне Науково-Культуролоґічне Общество Імени Александра Духновича та Русиньскій Культуролоґічный Клюб. Бобинец повіл, же задачами тых орґанізаций є плекати русиньску культуру і традициі, при чым основным принципом є неподільніст Украіны.

Бывшы війтове Команчы засуджены

Суд сказал бывшых війтів Команчы оскарженых о корупцию. Рік вязниці в завішыню на два рокы та дворічный заказ полніня самоурядовых функций. Такє засуджыня почули в Рейоновым Суді в Саноку бывшый війт ґміны Команча Станіслав Б. та його заступця Єжы К. оскаржены о корупцию. Суд узнал, што в 2007 році самоурядовці спільні і в порозумліню зробили залежным продолжыня арендуваня ґмінных ґрунтів од вплачыня арендовником 50 тис. зл для стоваришынь – Спільні для Туриньска і Підпора Локальных Ініциятив Команча Волк. Догваріня підписали аж по вплачыню грошы через Вітольда Сь. – поінформувал судя Артур Липиньскій, полномічный Округового Суду в Коросні. Оба оскаржены мают заплатити кару 56 тис. зл і опатити судовы кошты. Засуджыня не має правной моци. Справа тырвала пару років, бо арендар ґрунту неодолга по зложыню донесіня до прокуратуры вмер.

Будут аналізувати ґеном тіж представників меншын

Консорциюм European Centre for Bioinformatics and Genomics буде реалізувало проєкт «Ґеномічна мапа Польщы». Буде то найбільшый в істориі польской державы ґенетичный проєкт. Допоможе в науковых досліджынях і рыхтуваню модерных лікарств. В рамках задачы зроблят 5 тис. цілоґеномовых секвенцийонувань жытелів Польщы і на іх основі зрыхтуване буде інновацийне на світову скалю біоінформатичне нарядя до аналізы даных. Зроблят тіж прототип біоінформатичного нарядя до аналізы ґенетичной змінности етнічных меншын, якы жыют в Польщы. Плянуют проаналізувати 1000 секвенций ґеномів представників меншын. Згромаджены даны можут быти хоснуваны пак через дохторів до лікуваня конкретных пациєнтів. Ґенетичны даны і інформациі о мутациях даной особы мают влияня м.ін. на добраня одповіднього лікарства ци на індивідуальне добраня порциі ліку. Подібный проєкт реалізувано уж м.ін. в Великій Британіі. База, котру зроблят в Польщы, буде унікальна в тій части Европы.

Конец сезону для Бєщадской Узкоторовой Желізниці

Бєщадска Узкоторова Желізниця перевезла того рока 157 тис. туристів. То о три тисячы більше як перед роком. Презес фундациі, яка заряджат Бєщадском Лісовом Желізницьом, Мариюш Верміньскій повіл, што тот сезон был браз успішный. Од початку листопада/новембра проходит ремонт табору і торовиска, жебы наново з перевозами рушыти од січня/януара. Верміньскій спостерюг, што пасажерами сут представникы вшыткых поколінь, перед і по вакациях переважают зорґанізуваны ґрупы, літом – індивідуальны туристы, а найвеце переіздів было в жолтни/октобрі, з увагы на хвилю. Желізниця рушат з Майдану в девяткілометрову подорож до Бальниці, села на польско-словацкій граници. За вершком находит ся знане русиньскє село Осадне. По короткій перерві узкоторовый потяг вертат до Майдану. Узкоторова желізниця была основана в 1898 році. Роками хоснувано єй до транспорту дерева. В 20. роках ХХ ст. зачала перевозити люди. В 90. роках, по перерві, потяг зас выіхал на торы і є єдном з більшых атракций полудньово-східньой Польщы.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі