Голосник

Сумар дня на 27. серпня/авґуста 2019 р.

Приносиме Вам сумар медияльной ґрупы ЛЕМ.фм на ден 27. серпня/авґуста 2019 р.

«Ave Maria. Музичны медитациі при блеску свічок» – концерт на Св. Горі Явір

В найблизшу суботу, 31. серпня/авґуста, на Св. Горі Явір одбуде ся концерт пн. «Ave Maria. Музичны медитациі при блеску свічок». Концерт зачне ся о 19.00 год. в церкви Покровы Пресвятой Богородиці. Выступит трьох выконавців, двох гушлярів – Мариюш Мончак і Надія Мончак, та акордеоніста – Васіліс Мантудіс, котрый приіхат з Грециі. Мариюш Мончак є гушлярьом з лемківскыма коренями, знаным во світі. Концерт на Св. Горі Явір орґанізуваный буде в рамках 4. Медженародного Музичного  Фестівалю «При джерелах», котрый проходит уж цикличні на Лемковині. Його основательом, директором і орґанізатором єст як раз Мариюш Мончак.


7. едиция Паннонікы стартує уж о два дни

Уж о два дни, значыт 29. серпня/авґуста, стартує 7. едиция Паннонікы. Фестіваль буде тырвал 3 дни, до 31. серпня/авґуста. Серед головных звізд тогорічной едициі єст Ґоран Бреґовіч, котрый выступит зо свойом відомом по цілым світі Весільно-Похоронном Оркєстром. Буде і болгарска жіноча співоча ґрупа The Bulgarian Voices Angelite, котра уж в 90. роках з великым успіхом концертувала по світі і двакратні была номінувана до нагороды Grammy. Почути буде мож і сербского інструменталисту Бору Дуґіча, мастера фрулі, і македоньскій брасс банд Кочані Оркестар, знаный зо спілпрацы з Заком Кондоном і з рекордового чысла коверів своіх найбільшых гітів. Музичный проґрам дополнят болгарскій ансамбль Бісеров Сістерс, мадярскій ЕтноРом, з Польщы: Бум Бум Оркестар та Адам Струґ, італийскій БароДром Оркестар, украіньскій Луіку, французскій Aälma Dili та сербско-польскій проєкт Стефан Младеновіч Оркестар. Окрем концертів, орґанізаторы фестівалю рыхтуют більше як 60 товаришучых подій, примірно буде мож зберати зіля ци взяти участ в варштатах вырабляня домашніх косметиків.


Выстава образів наівного маляря Михала Сіріка в Пряшові

По літніх місяцях Музей Русиньской Культуры в Пряшові рыхтує дальшу выставу образів. Експозиция, вернісаж котрой пройде 5. вересня/септембра о 17.00 год., має наголовок «Жывот в русиньскым селі в творчости наівного маляря Михала Сіріка». Михал Сірік был єдным з найвызначнійшых малярів на Словациі. Тематичні занимал ся звыкамы, традициями і народописом Русинів. В його творчости нашли ся і жыдівскы темы. Через рокы свойой активной малярской діяльности артиста выставлял своі працы праві же на вшыткых вызначных выставах в державі і за єй границями. Образы артисты з темом жывота Русинів і Жыдів находят ся м.ін. в збірках словацкой нацийональной ґалериі в Братиславі, в Музею Модерного Кумшту Енді Варголя в Меджелабірцях, Музею Голокаусту в Вашынґтоні ци в приватных збірках.


Інтернетова премєра фільму Джона Ріґетті і Мариі Сільвестрі п.н. «Воскресеніє народа»

Новый документальный фільм од Джона Ріґетті і Мариі Сільвестрі, продукцию котрого підпорила John and Helen Timo Foundation, 4. вересня/септембра 2019 р. буде мал свою інтернетову премєру на офіцияльным каналі продуцентів в сервісі YouTube. Бесіда про «Воскресеніє народа», котрый єст оповістю про тридцетлітя русиньского возроджыня. Премєра фільму зачне ся о год. 19.30 за американьскым часом (год. 1.30 за лемківскым). Як пише Мария Сільвестрі в запрошыню, новым про орґанізаторів буде можніст обзерати образ і єдночасно вести дискусию з продуцентами ци самыма обзераючыма. Вшытко годно ся одбыти в сервісі YouTube, де в окремій рубриці буде нагода нажыво коментувати. На Фейсбуку покликано подію, котру вартат слідити, понеже будут на єй страні публикуваны інтересуючы інформациі тыкаючы фільму і премєры. Так само, входячы уж тепер в мотузок, під котрым 4. вересня/септрембра буде премєра, мож записати ся на обзераня, а додатково сервіс YouTube вышле нам скорше припомніня про сеанс. Офіцияльна премєра образу при участи запрошеных гости, заслуженых русиньскых діячів, продуцентів і дальшых одбыла ся уж 29. червця/юнія 2019 р. в просторах Театру Александра Духновича в Пряшові. Більше про сам фільм чытайте на нашым портали лем.фм.

Шеруй.

О авторі

Наталія Клинковска

Коментарі