Голосник

Сумар дня на 6. серпня/авґуста 2019 р.

Приносиме Вам сумар медияльной ґрупы ЛЕМ.фм на ден 6. серпня/авґуста 2019 р.

Великє заінтересуваня вакацийным получыньом Мушына-Попрад

Курсуючый через липец/юлий і серпен/авґуст потяг реляциі Мушына-Попрад тішыт ся великым заінтересуваньом. В минулый вікенд рекордове чысло осіб скорыстало з того получыня. В неділю вакацийным потягом поіхало більше як 130 осіб, а містит він лем 110. Як бесідує Артур Круліковскій з Уряду Міста в Мушыні, кондукторы порадили си з ситуацийом, маючы на увазі, же по дорозі потяг заберат іщы Словаків. На щестя вшыткы дотерли спокійні на місце. Як ся вказало, урухомлене того рока получыня Попрад-Мушына є єдном з найбільшых туристичных атракций на полудни реґіону. Потяг Мушына-Попрад курсує в суботы, неділі і в свята. З Мушыны одходит о год. 9.45. По дорозі затримує ся м.ін. в Плавци, Кежмарку ци Старій Любовни. Ціла траса рахує 80 км, а подорож тырват близко 1,5 год. Переізд в обі стороны коштує кус більше як 40 зл. Туристів притігают предовшыткым прекрасны ландшафты, головні панорама Татр, котры мож видіти і вчас подорожы, і в самым Попраді.


молоды.Русины просят на «Табір з молодыма по русиньскы»

Орґанізация молоды.Русины просит на «Табір з молодыма по русиньскы», котрый одбуде ся в днях од 29. серпня/авґуста до 1. вересня/септембра в Русиньскым Дворі в Малым Липнику. То уж десята едиция той акциі. І тым разом запрошены будут інтересуючы гості, котры передадут участникам своє знаня про русиньскій нарід. Табір є культурно-едукацийном подійом, вчас котрой мож дознати ся дашто більше о Русинах, іх культурі та істориі. Проєкт реалізуваный є завдякы фінансовій підпорі Фонду для Підпоры Культуры Нацийональных Меншын.


На Мадярах выбераны будут локальны самоурядовы меншыновы власти

Як інформувала мадярска державна пресова аґентура MTI, Нацийональна Выборча Комісия оголосила дату выборів локальных самоурядовых власти і старостів. В звязкы з тым на Мадярах выбераны будут і локальны самоурядовы меншыновы власти. Выборы будут проходити 13. жолтня/октобра тр. Як написано в документах тыкаючых выголошеных выборів, своіх кандидатів выберати будут члены 13 вызнаных нацийональных меншын, в тым і Русины. Выходит ся при тым з даных повселюдного списуваня, котре проходило в 2011 р. Жебы выникнули локальны самоурядовы меншыновы власти, потреба в даным реґіоні мінімальні 25-ох осіб, котры зголосили приналежніст до меншыны. На основі тых даных, найбільше локальных самоурядів будут мати Ромове, котры будут выберати своіх представників аж до 1383-ох самоурядів. Русины выберут новый склад до 44-ох самоурядів. Найменше локальных меншыновых самоурядів буде мала словеньска нацийональна меншына. Выборці, жебы могли заголосувати до меншыновых самоурядів, мусят ся зареґіструвати до 27. вересня/септембра.


Концерт Оркєстры св. Миколая в Івоничу

Ґмінный Осередок Культуры в Івоничу просит на подію під наголовком «Барвы погранича», котра пройде 11. серпня/авґуста. Культурный проґрам зачне ся о 16.00 год. на Пляци Дітля в Івоничу. Выступлят народный ансамбль Любатовяны, Карпатія з Украіны, ґрупа Вова бенд і колектив, котрый в своім репертуарі має, і розславлят по цілым світі, лемківску музику – Оркєстра св. Миколая.

Шеруй.

О авторі

Наталія Клинковска

Коментарі