Голосник

Сумар дня на 9. жолтня/октобра 2019 р.

Приносиме вам сумар медияльной ґрупы ЛЕМ.фм на ден 9. жолтня/октобра 2019 р.

Упамятнили жертвы  Карпато-дукляньской Операциі

6. жолтня/октобра є в Словациі Дньом Героів Карпато-дукляньской Операциі. З той нагоды празднувано в Дукли 75. річницю Карпато-дукляньской Операциі, значыт найбільшой і найбарже кырвавой битвы східнього фронту ІІ світовой войны. В торжественній подіі участ брали вшыткы найвысшы представникы Словацкой Республикы – президентка Зузана Чапутова, председа Нацийональной Рады Андрей Данко та премєр Петер Пеллеґріні. Президентка в неділю повіла, што Чехы, Словакы і Русины были протягом операциі в правильным часі в правильным місци, зато сут героями. Участників операциі підняла як примір правдивого, жертвенного героізму. Премєр Пеллеґріні повіл, што вшыткы тоты, котры пришли на подію для своіх близкых, сут носителями історичной памяти о індивідуальным геройстві і одвазі. На акциі при Памятнику Чехословацкого Армадного Корпусу в Дукли окрем гости зо Словациі і заграниці присутны были і воєнны ветераны. Десятьом міністер обороны Словацкой Республикы Петер Ґайдош признал памятны медалі. В часі битвы другом найвекшом нацийом по Чехах в арміі 1-го Чехословацкого Армадного Корпусу ґенерала Людвіка Свободы были Русины, котры жертвували своє жытя за освободжыня і обновліня Чехословациі.

Новы мосты в Ропі

30. вересня/септембра тр. малопольскій віцевоєвода Збіґнєв Стажец передал ґорлицкій старостці та представникам трьох ґмін: міста Ґорлиці, ґміны Мощениця та Липинкы чекы з дофінансуваньом в рамках Фундушу Самоурядовых Доріг. Разом до ґорлицкого повіту трафило більше як 7 млн зл на ремонты доріг. Значуча част грошы выдаткувана буде на ремонт повітовой дорогы Ропа-Высова в селі Ропа. 1. жолтня/октобра 2019 р. в Уряді Ґміны Ропа прошла стріча формального переказаня пляцу будовы повітовой дорогы. Присутны были м.ін. війт ґміны Кароль Ґурскій та Кжыштоф Фарон, представник выконавці. Реалізатором буде фірма Страбаґ Інфраструктура Полудне. Ремонт дорогы має ся зачати в тым місяци, а скінчыти в маю будучого рока. Ціліст робіт, значыт выміна дорогового покрытя на долгости 850 м та ремонт двох мостів, коштувала буде близко 3 200 000 зл.

Підпаліня в Боднарці

Близко шістдесят бель пашы в остатніх днях згоріло в Боднарці. За причыну огня вступні подає ся підпаліня. Більше як двадцетеро стражаків бороло ся з горіючыма белями в селі Боднарка. Перше зголошыня пришло в пятцнию, 4. жолтня/октобра. На місци вказало ся, што палят ся дві белі. В ночы з пятниці на суботу пришли наступны зголошыня. На місце задиспонувано 5 єдиниц: з Ґорлиц, Криґу, Боднаркы, Вуйтовой та Липинок. Оген занял 57 бель сіна. Жебы мочы тото загасити, треба было схоснувати тяжкій еквіпунок та побудувати водне становиско на місцевым потоку. На місци працувала тіж поліция. Вступні рішено, што не было то самозапаліня, в спрасуваній бели рідко до чогоси такого доходит. Властитель выцінил страты на коло 6 тис. зл, а вратуваный маєток на близко 5 тис. зл.

В Сербіі Тыжден Дітины

Од 7. до 13. жолтня/октобра в Сербіі празднує ся Тыжден Дітины. Тогорічне госло святкувань то: «Най кажда дітина – своє право хоснує легко». Для школярів русиньскых шкіл Петро Кузмяк в Рускым Керестурі ци Йован Йованович Змай в Дюрдьові орґанізуваны будут розмаіты акциі. В Рускым Керестурі діти возмут участ в квізі «Забавна математика» ци прогульках до Нового Саду, Кулы, Водиці. Будут орґанізуваны для них забавы, театральне представліня і спортовы активности. В Дюрдьові, окрем інчых, до діти придут писателі, якы пишут до часопису «Вітез», а в пятницю они самы будут продавати выробы свойой роботы на традицийным кєрмешы. Діти в Коцурі в рамках Тыжня Дітины возмут участ в едукацийно-забавовых подіях: будут варштаты, конкурсы, спортовы змаганя. В коцурскій бібліотеці наплянувано стрічу з писменником Бранком Стефановичом. Окрем забавовых акций, всядиль заплянувано і поважнійшы, котрых цілю є усвідомити наймолодшых, якы мают права, але і обовязкы выникаючы з прав дітины.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі