Голосник

Свідник буде і далшых пять років співпрацовати з ґмінов Ярослав

0
Місто Свідник в попередніх днях продовжыло платность Меморандума о співпраці з польсков ґмінов Ярослав на далшых пять років. Інформовала о тім аґентура TASR. Подля пріматоркы Свідника Марцелы Іванчовой собі од співпраці обіцяють реалізацію далшых проєктів.

„Маю надію, же то принесе довшу співпрацу. Сьме наймолодшым партнером ґміны Ярослав. Окрім Свідника мають далшых із Україны, Німецька і самособов із Польщі. Тішыме ся, же сьме нашли може і іншых спрязненых партнерів, бо од 2020-го року буде далшый проґрамовачій період на хоснованя фондів Европской унії,“ повіла про аґентуру пріматорка Свідника.

Івначова вірить, же ся місто і ґміні подарить зробити дакілько добрых проєктів довєдна.

Свідник бы хотів реконштрукцію амфітеатру

За словами пріматоркы вже має місто представу, што бы хотіло зробити в рамках проєктів з ґмінов Ярослав.

„Наприклад реконштрукцію амфітеатру, котрый є в такім стані, же собі выжадує безодкладну роботу і самособов і іншы діла, як розвииток турістічной інфраштруктуры і подобно,“ інформовала Іванчова.

Подля пріматоркы є в припаді співпраці із загранічным партнером простіше здобыти грошы з Европской унії. Свідник в минулости быв успішный в рамках співпраці з Ярославом в проєкті третьой фазы ревіталізації центра міста в цілковій сумі 500 тісяч евр.

„З польскым партнером сьме реалізовали і такзваны магкы проєкты, котры были заснованы на черяню културной, хрістіаньской або природной дідовизны, як наприклад проєкт під назвов Путь інтеґралной обновы чоловіка Via Reginae, Містіка карпатьскых місць, а так само проєкт під назвов Днесь є завтра – решпектуєме зелену дідовизну,“ інформовала Крістіна Тхірова, говоркыня міста Свідник.

Остатній споминаный проєкт мав дати стімулы на векше хоснованя алтернатівных жрідел воды і были до нього залучены штуденты Ґімназії дукляньскых героїв у Свіднику.

Жрідло фотоґрафії: Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар