Голосник

Світ, котрый проминул в фотоґрафіях Постемпского і Райнфуса

0
До 24. липця/юлия в Ґалериі Фотоґрафій Міста Ряшів видіти мож выставу знимок двох нежыючых польскых фотоґрафіків, котры в своім часі вельо посвятили документациі лемківского світа. Вернісаж выставы «Світ, котрый проминул. Штоденне жытя лемківской родины на фотоґрафіях Здзіслава Постемпского і Романа Райнфуса» прошол 22. червця/юнія.

Одкрыта выстава то фотоґрафіі зо збірок Музею Народного Будівництва в Саноку і ряшівской ґалериі. Знимкы вказуют на жытя Русинів довыселенчой Лемковины. Авторы записали на образах много моментів зо штоденного лемківского села. Найбільше чысло знимок походит з 40. років ХХ ст.

При тій нагоді орґанізаторы выпустили альбом, в котрым видіти мож перепечатаны декотры знимкы. Вводне слово представлят ведучый Товариства для Розвитку Музею Лемківской Культуры в Зындрановій, Богдан Ґоч. Альбом поділеный єст на части: Лемкы, Штоденны занятя, Товарискє Жытя. На послідніх странах албому з такым самым наголовком як наголовок выставы, чытати мож біоґрафіі З. Постемпского і Р. Райнфуса. Зрыхтували іх Барбара Бокота-Томаля і др. Губерт Осаднік.

На експозициі окрем цінных фотоґрафій позерати мож на артефакты з зындранівского музею. Презентуване єст ориґінальне народне облечыня з ріжных части Лемковины. Вернісаж так само прикрасил своім выступом дует Ганця і Славко.

О кілько знимкы Рейфуса про декторых сут знаны, напримір з попередніх вернісажів, о тілько архів Постемпского уж ніт. Більшіст з представленых фотоґрафій дотля не было шырше вказуваных. Тым більше, част зо знимок підписана єст лем приближеном датом знатя, без детального подаваня даного села. Част з них мож прібувати льокувати по облечыню.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар