Голосник

ТАД одпремєрує Пісковиско Михала Валчака

0
В пятніцю 17-го мая 2019-го року одбуде ся на Малій сцені Театру Александра Духновіча в Пряшові (ТАД) вже четверта премєра в рамках той театралной сезоны. Русиньскый професіоналный театер тот раз інсценує текст польского автора Михала Валчака.

„Пісковиско є найліпша пєса (гра) 21-го столітя про двох акторів (грачів)“, пишуть творцьове о новій інсенації. Режійно нову пєсу приготовлює Браньо Мазух, про котрого є то третя співпраца з ТАД. Перед тым режіровав Достоєвского Бісы і Краля Убу Алфреда Жарі.

Пісковиско як платформа про конфронтацію

Пєса Пісковиско із 2002-го року є першым твором полського драматіка Михала Валчака, котра была оцінена в рамках конкурзу Мы на порозі новой епохы, і котра дочекала ся великой одозвы нелем в Польщі, але і за граніцями.

Такой потім выникли його далшы пєсы як Путь до внутра цімры, Чудна ріка, Баня, Ночный автобус, Ціле жытя Ярослава ці Налпа. Валчаковы тексты барз скоро дочекали ся перекладів на анґліцькый, німецькый, літовскый, італійскый, французькый, сербскый, чеськый, словацькый і многы іншы языкы. Пісковиско є перша його пєса, котра вже має і русиньску верзію.

Пісковиско є пєса про двох акторів – мужа і жену, кота є розділена до шестьох образів – шестьох днів, котры суть зображены часточно як дополідне, часточно як пополідне. Но і в тім буде інсценація в русиньскім театрі дакус выняткова. Режісер вырішыв зохабити мужску і женьску роль, но грати будуть дві акторкы. Зденка Кваскова взяла на себе роль мужа, Івета Фейкова буде грати жену. Обидві належать ку наймолодшій ґенерації членів драматічного колектіву ТАД.

„Много сітуацій, котры здають ся быти дорослыма, суть в реалности інфантілны,“ пише автор о своїй пєсі, в котрій першорядо конфорнтує мужскый погляд на світ із женьскым. Но як пишуть інсценаторы, секундарно є Пісковиско так само платформов про конфронтацію дітячого і дорослого, реалного і фіктівного, высловленого і замовчаного, певного і текучого, конкретного і абстракнтого.

Михал Валчак

Польскый драматік Михал Валчак (1979 р.) є співосновательом варшавсого кабарету Pożar w Burdelu і належыть меджі найвыразнішы авторьскы особности сучасного польского театру. Выштудовав театралну науку і театралну режію на Театралній академії у Варшаві.

За „вытворіня унікатного, крітічного і проникаво гуморного языка, котрый описує днешню Польщу“ быв вєдно із Мацієйом Лубєньскым у 2017-ім році номінованый на премію польского тыжденника Polityka, такзваный Paszport „Polityki“.

Премєра Валчакового Пісковиска одбуде в пятніцю о 19.00 год. День перед тым, в четверь 16-го мая мож іти на предпремєру, котра одбуде ся в єднакім часі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар