Голосник

Три інтересны рождественны події

Рождество ся ближыть, о то веце тым, котры святкують за новым календарьом. В повязаню з тым праздником рихтують ся і многы інтересны події. Приносиме першы дві з них, котры вже были оголошны їх орґанізаторами.

17-го децембра 2019-го року o 17.00 в просторах Словацького народного музею – Музею русиньской културы в Пряшові одбуде ся літературно-музичный вечор під назвов Рождество в духовній поезіі Осифа Кудзея і співанках Фолклорного колектіву Заруба з Няґова.

Oсиф Кудзей є лавреатом Премії Александра Духновіча за русиньску літературу і лавреатом Ціны Александра Павловіча од словацького Літературного фонду, знамый байкарь, автор духовной поезії і перекладатель літурґічных текстів із церьковнославяньского до русиньского языка. Выбер його поезії з поетічных збірок Кадило і Пацеркы будете чути в інтерпретації Яны Трущіньской – Сивой.

ФК Заруба, якый в минулости репрезентовав русиньску културу дома і за граніцьов, по дакількорічній перерві обновлює свою діятельность. Премєру буде мати якраз на рождественьскім вечорі в нашім музею в Пряшові.

На 20-го децембра 2019-го року приготовив проґрам під назвов Хрістос Раждаєтся! наш Піддукляньскый умелецькый людовый субор. Ціловечурный концерт в двох образах є обогаченый о шпеціалных гостів: Ленку Барілікову – Спішакову, акторку  Театру Андрея Баґара в Нітрі і Яна Ґалловіча, актора драматічного колектіву Словацького народного театру в Братіславі.

Під діріґентьсков тактовков Юліуса Селчана, в хореоґрафічній обробці Ярослава Моравчіка і Віліяма Мікулы, а в умелецькім выконаню професіоналных інтерпретів маєте унікатну можливость зажыти вечур повный радости, покоры і умелецького зажытку. Першый образ – Щедрый вечур, є вынятковым образом повным духовных і світьскых колядок з ангелами, пастырями і кралями, котрый є в дусі народжіня Божой Дітинкы. Проґрам зачінать о 18.30 год. на Великій сцені Театру Йонаша Заборьского в Пряшові.

Третьов інтереснов подійов – то III. річник Рождественного концерту Нова радость стала, котрый ся уж традічно одбуде в Културнім домі в селі Iгляны дня 21-го децембра 2019-го року зо зачатком о 19.00 год. Концерт пририхтовало обчанске здружіня молоды.Русины в співпраці зо селом Iгляны.  Выступати будуть Фолклорный ансамбель Рутенія з Братіславы, Дівчата з Iглян, Мужске співацьке тріо з Камюнкы, Мужске тріо з Чірча і отець Мірослав Гуменик.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі