Умер Михайло Зазуляк

0

Як інформовала пресова аґентура Рутенпрес, вночі з пятніці 3-го новембра на суботу 4-го новембра 2017-го року по тяжкій хвоторі умер в шпыталю у Вербасі во віці 56 років русиньскый новинарь, културный діятель Михайло Зазуляк.

Народив ся Михайло Зазуляк в Руськім Керестурі 12-го апріля 1961-го року. Там жыв і робив як новинарь од 1984-го року в ґазеті „Руске слово“, котра выходить в Новім Саді, єден час быв і головный редактор керестурской редакції тых новинок. Од 2010-го року быв редактором пресовой аґентуры Рутенпрес. Михайло Зазуляк быв і довгорічным співпрацовником Радіа і телевізії Новый Сад, наперед робив проґрамы в русиньскім языку, но пізніше і по сербскы.

Окрім новинарьской роботы Михайло Зазуляк быв і довгорічным актівістом в рамках русиньской културы. Быв членом колишнього русиньского театру „Дядя“ і сучасного Русиньского народного театру „Петро Ризнич Дядя“. В театрі діяв як актор, член веджіня, режісер і автор тлумчінь драматічных текстів. Як актора го люди знали не лем з театру, а і з радіовых пєс, котры приготовльовала русиниска редакція в Новім Саді, ці русиньскых проґрамів новосадьской телевізії. Як бывшый успішный декламатор од 1982-го року реґуларно приготовльовав русиньскых декламаторів, но і декламаторів на україньскім і сербскім языках. За свою роботу в театрі і в области декламації быв нагородженый в рамках Войводины і на цілорепубліковім рівню. Од 80-ых років Михайло Зазуляк брав актівну участь і на творіню проґрамів про найвекшы русиньскы културны події у Войводині – фестівал „Червена ружа“, Драматічный меморіял „Петро Ризнич Дядя“, „Костельникова єшень“, но і про многы далшы події.

Михайло Зазуляк діяв і в рамках Націоналного совіту Русинів, наперед як секретарь Одбору про културу, пізніше як член совіту і його културного одбору.

Похороненый буде Михайло Зазуляк в неділю, 5-го новембра в його роднім Руськім Керестурі. Вічная память!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Share.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.