Голосник

Уповномоченый дале робить на пошырьованю двоязычности

Довгодобым цільом Уряду уповномоченого влады Словацькой републікы про народностны меншын є просадити закон о хоснованю языків до штоденной практікы. В місяці авґуст з той причіны Ласло Буковскый ініціовав стрічу з ґенералным директором Желізніць Словацькой републікы Мартіном Едешійом, з котрым бісідовав о можливости  росшыріня двоязычности на желізнічных штаціях і заставках.

Буковскый Ердешія пожадав о доповніня обозяковых і доповнюючіх інформацій в меншыновім языку на желізнічных штаціях в селах, де народностна меншына творить холем 20 процент населіня. Ґенералный директор желізніць убезпечів уповномоченого, же веджіня компанії до 30-го септембра 2018-го року заналізує сітуацю і в припаді недостаточной аплікації закона о хоснованю языків народностных меншын зробить потрібны крокы.

Буковскый в авґусті так само писмом звернув ся до старостів і пріматорів дакотрых меншыновых сел в Нітряньскім і Кошыцькім краю, в котрім їх жадать о выражіня ся ку можливости означіня автобусовых заставок і в меншыновім языку компанійов Arriva a.s. Меджі уповномоченым і директором той транспортной компанії перешло дакілько їднань в тій справі. Уряд уповномоченого очекує одповіді на писмо до кінця авґуста і з потішіньом конштатує позітівный приступ і выражіня многых сел уж теперь.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі