Голосник

Успіх молодой Лемкыні Ольгы Шевчык

0

5. грудня/децембра в Польско-Словацкым Домі ім. Душана Юрковича в Ґорлицях прошло розвязаня фотоґрафічного конкурсу пн. «Мій Низкій Бескід». В єдній з конкурсовых катеґорий перемогла молода Лемкыня, Ольга Шевчык. 

Сема едиция конкурсу поділениа была на дві тематичны катеґориі, а тоты – поділены были іщы на віковы. В катеґориі до 12 років «Природа і архітектура», перше місце признано Ольгі Шевчык з Ропиці Польской (д. Дольна). Ольга перемогла за збірку пятьох знимок, якым дала наголовкы – «Ліс во гмлі», «Свята Гора Явір» та «Святий Ліс». Окрем головного выріжніня, молодій фотоґрафці признано тіж за тоты знимкы специяльну нагороду – грамоту Гірского Кругу Звязку Польскых Артистів – Фотоґрафіків.

Нагороджены і другы оцінены знимкы мож обзерати на поконкурсовій выставі, котра находит ся в будинку Польско-Словацкого Дому при ґорлицкым рынку. Конкурс адресуваний был до шкільной молодежы з польскых і словацкых шкіл. Його головном цілю являт ся вказаня специфікы і красы Низкого Бескіду та зіманя молодыма любителями фотоґрафіі специфікы вельокультуровой обшыри польско-словацкого погранича. Як раз Ольга Шевчык зосередила ся на красі Лемковины, што представила в своіх працах.

Лавреатка ходит до шестой клясы Основной Школы в Ропиці Польскій. Як признає, окрем фотоґрафіі, радо своі заінтересуваня зосереждат на малюваню і інчых шыроко понятых плястичных занятях.

Долов презентуєме вшыткых пят фотоґрафій, якы были післаны на конкурс. 

 

 

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар