Голосник

Ужгородьскый єпарха мав тяжку гаварію

Єпарха Мукачівской ґрекокатолицькой єпархії владыка Мілан (Шашік) мав через вікенд тяжку гаварію. Інформовалa о тім Пресова канцеларія Конференції епіскопів Словакії (TK KBS) одкликуючі ся на словацьке католицьке радіо Lumen.

Як інформовало радіо у своїх вістях, авто, в котрім сидів владыка Мілан, на южній Словакії зразило ся з автом, кторе перешло до протинапряму і передньов частьов наразило до авта владыкы. В авті, котре ішло в протинапрямі, были три особы, якы гаварію не пережыли. Єпіскоп і його шофер были зранены і госпіталізованы. Радіо інформовало, же єпіскопа пропустили зо шпыталю на реверз (властну жадость) і лічіть ся дома в Ужгороді.

Доповнюєме, же владыка Мілан праводоподобно вертав ся із Мадярьска, із дводньового єпархіалного паломництва ку Чудотворній іконі Маріяповчаньской Богородіці, де быв зо своїма священиками і вірниками.

Жрідло фотоґрафії: Греко-Католицьке Закарпаття.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі