Голосник

Вышов комплетный русиньскый переклад Старого і Новога завіта

25-го новембра 2019-го року одбыла ся в адміністратівнім центрі Єпархії св. Николая в Руськім Керестурі, котрый находить ся в Новім Саді, історічна дія. В резіденції єпархы одпрезентовали нововыданый переклад цілого Святого Писма – Старого і Нового завіта.

Як інформовала аґентура Рутенпрес, на презентації і пресконференції з тым повязаній привітав вшыткых участных єпарха Ґеорґій Джуджар. Переклад є в бачваньскій варіанті русиньского языка.

Має быти в каждім обыстю

„Треба, жебы Бібіля была в каждім обыстю, не лем на полічці, зато про ню одкрыйме нашы сердця і душы, про невычерьпне жрідло одповідей на вшыткы найвекшы вопросы у жывоті,“ повів владыка Ґеорґій почас презентації.

Біблію перекладав Др. Янко Рамач, котрый припомянув, же робота на перекладі почала з підпоров і помочов вже покійного францісканина о. Др. Тадея Войновіча.

Русиньскы біблічны переклады

Войводиньскы Русины вже мали зробленый і схваленый переклад Нового завіта скоріше. Переклад зачали робити у 2003-ім році і вышов у 2006-ім році, коли сьме собі припоминали 360-річніцю Ужгородьской унії.

В рамках карпатьскых варіантів русиньского языка існують лем переклады, котры суть выдаваны Пряшівской ґрекокатолицькой архієпархійов. Хоць тлумачіня зачали ся робити вже у 1980-ых роках, дотеперь з церьковным схваліньом вышло лем Тетраєвангеліє у 2009-ім році. Апостоларь, хоць є приготовленый до друку понад рік, чекать на схваліня пряшівского метропіліты.

Окрім того суть в пряшівскім штандарді офіціално переложены дакотры псалмы, котры находять ся в богослужінях, якы вже были выданы архієпархійов.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі