Голосник

В ареалі обсерваторії в Розтоках нова атракція

0
Навщівници астрономiчнoй обсерваторії в селі Розтокы, котре находить ся в окресі Свідник, найдуть теперь в ареалі нову атракцію. Можуть собі посмотрити моделы сонечной сістемы. Інформовала о тім словацька пресова аґентура TASR.

Обсерваторія в Розтоках належыть під Піддукляньскый освітній центер у Свіднику. Ку шпортовым і оддыховым зонам в екстерьєровых просторах в тых днях прибыв парк сонечной сістемы.

Поможе дітям і дорослым

„Вытворили сьме научну стежку, на котрій суть окремы моделы сонечной сістемы. На зачатку є сонце із пописом. Служыть то вшыткым віковым катеґоріям, од дітей аж по дорослых, бо мають можливость прочітати собі, видіти фарбу і великости моделів. Думам, же то барз поможе заінтересованым в справі природных наук, астрономії,“ повіла про аґентуру Марія Пайзінкова, директора Піддукляньского освітнього центру, під котрый обсерваторія належыть.

Не все є подля Пайзінкпвой слов з причіны погоды можливе хосновати телескоп. „Часть актівностей робиме в містности про лекції, но окрім того, кедь войдуть до ареалу, можуть і без лектора люди дізнати ся, што властно тота сонечна сістема є. Входять через велике сонце і з пописів дізнають ся, котра планета як є велика, кілько є од сонца і так подобно,“ пояснила Пайзінкова.

Астрономічну обесравторію в Розтоках навщівлюють школярі в рамках єднодньовых вылетів, но абсолвують ся там і довшы перебываня, наприклад і про турістів. В рамках ареалу обсерваторії суть зроблены і просторы, котры служать на уквартельованя.

Козмос на долони

Будова коло астрономічной обсерваторії в Розтоках, была збудована у 1926-ім році. „Є то памятково хоронена деревяна хыжа. В році 2005 перешла великов реконштрукційов. Зробили ся штандартны обставины про уквартельованя, жебы реалізовати сельску турістіку з капацітов 28 місць,“ інформовала директорка Піддукляньского освітнього центру.

В ареалі находить ся волейбалове гріско, тенісовы курты, є там оддыхова зона. К діспозіції суть два телескопы, обсерваторія діспонує і далшыма мобілныма телескопами.

Парк сонечной сістемы быв збудованый в рамках проєкту Козмос на долони 2017, котрый є фінанцованый із средств Европского фонду реґіоналного розвитку посередництвом проґраму Interreg V-A Польща – Словакія 2014 – 2020.  Выбудованя научной стежкы собі подля Марії Пайзінковой выжадало вытраты в цілковій сумі 12 650 евр.

Жрідло фотоґрафії: Dukla Destination.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар