Голосник

В Братіславі проходив семінарь о охороні народносных меншын в СР

0

В рамках діалоґу о резутлатах мініторованя імплементації Рамкового договору на охорону народностных меншын в Словацькій републіці зорґанізовав уповномоченый влады СР про народностны меншыны Ласло Буковскый в співпраці із Секретаріатом Рамкового договору на охорону народностных меншын в днях 4-го і 5-го децембра 2017-го року в братіславскім готелі Bôrik міджінародный Follow-up семінарь к імплемантації Рамкового договору на охорону народностных меншын в СР.

Як інформує офіціалный сайт уповномоченого про народностны меншыны, подію, котра мала чотири панелы, одкрыв уповномоченый і візепрезідентка Порадного комітету рамкового договору Бріґіта Буш. На зачатку події Невен Анджеліч і Рейніс Аболтінш, членове порадного комітету, презентовали головны заключіня і рекомендації 4-ой оцінюючой справы о Словацькій републіці. В рамках першого панелу, заміряного на підпору толеранції, взаємного решпекту і інтеркултурного діалоґу, із свойой лекціов выстуапала словацька обмудсманка Марія Патакійова, презентованый быв і прояв міністеркы справедливости Луції Жітняньской і уповномоченого влады про ромскы комуніты Абела Раваса. В тій части было мож выслухати і Калмана Петоца, підпредседу Рады влады СР про людьскы права, народностны меншыны і родову рівность.

„В другім панелі, котрый быв заміряный на выхову і освіту народностных меншын, быв вытвореный простор про лекцію Петра Крайняка, державного секретаря Міністерства школства, наукы, досліджіня і шпорту СР. Ку тій проблематіці дали свій вклад своїма лекціями і Тібор Тот, член Выбору про народностны меншыны і етнічны ґрупы за мадярьску народностну меншыну, Анна Плішкова із Інштітуту русиньского языка і културы Пряшівской універзіты в Пряшові і Юлія Вархолова зо  Studia Academica Slovaca на Філозофічній факулті Універзіты Коменьского в Братіславі,“ пише далше сайт уповномоченого.

В третім панелі, присвяченім охороні і розвитку културы языків народностных меншын, до діскузії прияли запрошіня Конрад Ріґо – державный секретарь Міністерства културы СР, далше говорця Округлого стола Мадярів Ґейза Токар, Зузана Куманова із обчаньского здружіня In Minorita і Мартін Дуфала, котрый на події быв представительом Округлого стола Русинів Словеньска.

В остатнім панелі быв одпрезентованый 4-ый тематічный коментарь: Россяг діяня Рамкового договору на охорону народностных меншын. Позіцію ку тому важному документу про просаджованя політікы меншын на Словакії высловив і уповномоченый про народностны меншыны Ласло Буковскый, як і далшы представлтелі меншын.

Жрідло фотоґрафії: narodnostnemensiny.gov.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар