Голосник

В Дебрецині торжественно одкрыють і посвятять русиньскый дім

0
Од пятніці 26-го апріля 2019-го року будуть мати ґрекокатолицькы Русины, котры жыють в Мадярьску своє „обыстя“. В тот день владыка Філіп (Кочіш), гайдудорозькый архієпіскоп і метрополіта посвяить Русиньскый ґрекокатолицькый центер, котрый збудовали в районі міста Дебрецин – Йовжа.

На торжественнім одкрытю нового русиньского дому будуть брати участь представителі мадярьской державы і дебрециньской самосправы. Як раз держава выбудованя центру фінанцовала.

Простор про стрічі

„Ту будеме годны ся стрічати, бісідовати і коордіновати свої дії в будучности,“ повіла Віра Ґіріц, представителька Русинів у мадярьскім парламенті нецілы два рокы тому, кедь ся в місяці юл 2017-го року положыв фундамент – основный камінь центру, котрый буде в пятніцю посвяченый і торжественно одкрытый.

В приговорі почас події втогды Ріхард Тірчі, котрый заступав одділіня про народности Міністерства людськых жрідел Мадярьска, звернув увагу на тото, же „хоць Русины і не мають своюй державности, што є смутным про вшыткых, но мають свій дім ‒ Ґрекокатолицьку церьков.“

В Мадярьску ся в остатнім переписі населіня приголосило 3882 людей ку русиньскій народности, з того 1777 ку Ґрекокатолицькій церькви.

На домі буде ерб і крест поблагословленый Папом римскым

Кінцьом марца того року высокопреосвященый Філіп вєдно із Віров Ґіріц i Віктором Крамаренком – председом Вседержавного русиньского самосправованя в Мадярьску, брали участь на авдієнції у Папы римского Франціска.

Русиньска делґація взяла на авдієнцію з дерева вырізаный русиньскый ерб і крест, котры мають быти на фасаді нового центру. Папа рисмкый Франціск почас авдієнції, котра проходила на Площі св. Петра, поблагословив тоты принесены предметы, о чім было зроблене з владыком Філіпом і інтервю мадярьскым высыланьом Radio Vaticana.

На одкрытю і представителі державы і міста

Як вже было спомянуте, выбудованя Русиньского ґрекокатолицького центру фінанцовала мадярьска держава. Держава буде мати присутного представителя і на святочнім одкрытю, котре буде повязане з посвячіньом новой будовы.

Русинів на події поздоровить Мікловш Шолтес, державный секретарь із вопросів реліґійных і націоналных звязків Канцеларії премєрміністра Мадярьска. За самосправу – місто Дебрецин, буде брати участь найвысшый представитель Саболч Комолої, котрый є пріматором (мером) Дебрецина. Участным ся приговорить і представителька русиньской меншыны в парламенті Мадярьска Віра Ґіріц.

Торжественным завершалным пунктом пятніцьового проґраму буде споминане посвячіня, котре буде одправляти владыка Філіп. Подія є підпорена Міністерством людьскых жрідел і Канцеларійов премєрміністра Мдярьска.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар