Голосник

В днесь неєствуючім селі Руське є фотоґрафічный памятник

В бывшім русиньскім селі Руське, в окресі Снина, є „фотоґрафічный памятник“. На стіны гаєнкы были іншталованы фотоґрафії родака Йосифа Лауруского і фотоґрафії з родинных албумів бывшых жытелів села. Выставку в тых днях приготовив Вігорлатьскый музей і Фотоклуб Reflex. Інформує о тім словацькый денник Korzár.

Село Руське, вєдно із далшыма русиньскыма селами – Дара, Остружніця, Звала, Велика Поляна, Смолник і Старина, было у 1980-ых роках выселене і офіціално счезло з мапы світа. Люди мусили свої обыстя зохабити з причіны будованя водного діла Старима, котре забеспечує воду на питя про северовыход Словакії. Напрік тому люди не забыли на свої родны села, і на місцях, котры суть повязаны з їх жывотами і жывотами їх предків, ся уж майже тридцять коків стрічають ґенерації людей, жебы собі припомянути свої коріня.

Такой од зачатку, од выселіня, зміну країны документовали фотоґрафы, філмарі і вытварници. В співпраці із Урбаріятом села Руське з центром в Снині і Фотоклубом Reflex зерезоновала в музею думка сотворити „фотоґрафічный памятник“ в одкрытім просторі бывшого села.

„Є присвяченый нелем людям спід Пляші, найвысшого верьху в Руськім, но і турістам, навщівникам края богатого на природны красы,“ повіла про денник Марія Мішкова із Вігорлатьского музею.

Думка памятника ся стала реалностьов 18-го септембра 2016-го року. На фасаді гаєнкы і в їй інтерьєрі публічно сприступнилии 40 фотоґрафій. За словами Мішковой представлюють суґестівну выповідь о заникнутім селі во фотоґрафічнім документі. Документі з міцнов анґажованостьов до істосрії країны і світа людей, котрый заникнув. Выставці домінують фотоґрафії родака з Руського – фотоґрафа Йосифа Лауруского.

Выставка была одкрыта в день, коли родаци святковали одпуст, кідьже церьков была в Руськім присвячена Рождеству Богородіці. На святі брав участь і высокопреосвященый владыка Ростислав, православный архієпіскоп пряшівскый, метрополіта Чеськых країн і Словакії. На місці, де колись стояла православна церьков, владыка посвятив нову каплічку.

Выставка в гаенці є за словами Мішковой з Вігорлатьского музею лем першов етапов. Творчі актівности будуть в просторах продовжовати далшыма, тырвалішыма іншталаціями.

На фотоґрафії: Село Руське перед выселіньом. Жрідло фотоґрафії: www.regionalnedejiny.sk.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі