Голосник

В Ґалицийскым Місточку отворено едукацийно-сенсоричну загороду

В загороді поміщено обєкты, якы мож нюхати, дотыкати ци якых мож слухати. Присутный на торжественным одкрытю, 28. серпня/авґуста 2019 р., Вітольд Козловскій, маршалок малопольского воєвідства, повіл, што в тій неповторній загороді каждый найде штоси для ся – можна гын ся бавити, але тіж і вести едукацийны ци терапевтичны варштаты.

В Ґалицийскым Місточку в части за копійом ратуша зроблено пленерову експозицию з сельскыма міні-загородами з елементами выпосажыня і декорациями характерныма для штырьох ґруп презентуваных в Сандецкым Етноґрафічным Парку, значыт Лемків, Погірян, сандецкых Лахів і ґуралів.

В місци для діти сут елементы до забавы (белька балансу, плятформы, пісковниця і гойдавкы) та сенсорична част. Тота друга ма влияти на нюх і дотык. Поміщено гын прим. стежку, по якій ходит ся босо – вказує она, як зміняли ся дилины в сельскых хыжах на просторі років. Є конструкция з дзвінками та колатками, котрыма мож тестувати черчаня. Сут тіж скринкы з рослинами, котры характерны сут для народной обрядовости і якы хоснує ся в натуральній медицині.

Едукацийно-сенсорична загорода є частю більшого проєкту «Одкрыты Музеі» реалізуваного при фінансовій підпорі зо середків Європейского Союзу. В части реалізуваній Округовым Музейом в Новым Санчы в рамках проєкту модернізуваны сут тіж Музей Никыфора в Креници та Пєніньскій Музей в Щавници – одділіня сандецкого Музею.

Фот. Пресове Бюро Маршалківского Уряду Малопольского Воєвідства

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі