Голосник

В Ґладышові посвячено крест і пляц під будову нового храму

0
7. липця/юля 2018 р. в ден покровителя православной парохіі в Ґладышові, св. Йоана Крестителя, котрий є так само єдным з покровителів перемышльско-ґорлицкой єпархіі, была служена шторічна святочна літургія при участи ординария єпархіі, архієпископа Паісия. Тогорічний кєрмеш для місцевой парохіі явил ся вынятковым за причыном посвячыня креста і пляцу під будову новой православной святыні в селі.

Праздник в ґладышівскій парохіі зачал ся од привитаня владыкы через діти, вірных та пароха о. Аркадия Баранчука. Проповід в лемківскым языку выголосил о. Ярослав Ґрич. По крестным ході вколо дотеперішньой православной святыні в Ґладышові – каплици св. Йоана Крестителя (возн. в 1857 р., перебуд. в 1914 р.), владыка посвятил новий автобус придбаний Православным Осередоком  Милосердя Елеос.

Надале процесия пішла ґу пляцови в центрі села, де має быти побудувана нова парохіяльна церков. Найперше владыка посвятил крест і пляц, де неодолга зачне ся возношыня храму. Архієпископ Паісий в казаню до присутных напомнул, што нова церков то свідоцтво віры в місци, де такой Лемків мало уж веце не быти. На подіі присутны были локальны самоурядовы власти, місцевий римокатолицкій парох та представникы інчых ґруп.

фот. Миколай Ґрич

фот. Миколай Ґрич

фот. Миколай Ґрич

фот. Миколай Ґрич

фот. Миколай Ґрич

фот. Миколай Ґрич

Ґладышівска церков взорувана на незнаівскій

Коли перед парома роками офіцияльно выявлена была думка побудуваня новой православной церкви в селі, такой одраз вказало ся, што храм буде вірном копійом неістнуючой церкви свв. Космы і Даміана з Незнайовой. Незнаівска святыня была побудувана в 1780 р. в традицийным західньолемківскым стилю. Церков служыла вірным до 1930 р., коли в селі побудувано нову православну церков. Деревяна стара церков не была хоснувана од того моменту до періоду выселінь з 1945-47 рр. Фінально, завалила ся в 1964 р., а вежа впала 1973 в році. Была то єдна з красшых лемківскых церкви в реґіоні.

Церков в Незнайовій, фот. Р. Рейнфус

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар