Голосник

В Гостовицях припомянули собі жертвы войны

На турістічный поход ку дзвоніці над селом Гостовиці в окресі Снина пршило в суботу 27-го юла 2019-го року коло 60 турістів із Словакії, Польщі, Мадярьска і Чеськой републікы. Інформовала о тім аґентура TASR.

Перед навщівов битевного поля із Першой світвой войны на верьху Скоры зробив ся і пєтный акт на містнім войновім цінтері. Аґнетуру о тім інфомовав Мартін Дробняк із Клубу воєньской історії Бескіды.

Походы од 2015-го року

Турістічны походы суть повязаны з подіями Першой світовой войны, котра зачала 28-го юла 1914-го року. В селі Гостовиці їх орґанізують од року 2015. Як повів про аґентуру Дробняк, вже почас першого річника выникла думка збудовати прямо на битевнім полю даяке місце памяти, котре бы припоминало жертвы той войны.

„Вже у 2016-ім році подарило ся прямо на верьху Скоры збудовати дзвоніцю, котра має приоминати події Першой світовой войны і смутну долю множества вояків, котры вмерли у тім конфлікті,“ пояснив представитель Клубу воєньской історії Бескіды.

В слідуючіх роках подарило ся ку дзвоніці выбудовати научну турістічну стежку, котра обсягує дакілько інформачных панелів, якы турістови приближують інформації о тім, яка проходила бойова діялность в реґіоні, якы наслідкы мала, і хто конкретно войовав в околіці села.

Меджінародный табор

В попередніх днях на войновых цінтерях на северовыході Словакії проходив і Меджінародный добровольницькый табор, котрый Клуб воєньской історії Бескіды орґанізує од 2011-го року. Як про аґентуру повів Дробняк, почас табора робило на цінтерях 20 добровольників із Словакії, Польщі і Мадярька. Участници табора робили і на войновім цінтері в Гостовицях.

Ілустрачна фотоґрафія: hostovice.sk

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі