Голосник

В Хорватії хотять обмеджіти права меншын

0
Хорватьскы конзерватівці, котры ведуть кампань за зміну выборчіх законів, дали до парламенту достаточну кількость підписів на выголошіня рефенрендума, в котрім бы ся вырішовало о обмеджіню леґіслатівных прав ґруп, якы заступають народностны меншыны. З одкликаньом ся на Reuters о тім інфомує словацька державна пресова аґентура TASR.

Конзерватівці хотять знижыти кількость депутатів хорватьского парламенту із 150 на максімално 120. Вєдно з тым хотять зредуковати кількость депутатів, котры заступають народностны меншыны. Референдум бы за їх думками міг одбыти ся в септембрі або октобрі того року.

Представитель ґрупы „Народ рішать“ Домінік Кнезовіч выразив ся, же того часу є в Хорватії сітуація, коли меншыны можуть рішыти і о тім, ці скінчіть влада або ніт. Ґрупа, за котру ся выразив, думать, же бы ся меншыны мали занимати лем проблемами, котры дотуляють ся реґіонів, културы або ідентічности. Кнезовіч арґументує, же тота ініціатіва є в згоді із конштітуціов. Іншый погляд має хорватьскый премєр Андрей Пленковіч, котрый говорить, же таке голосованя бы было протиконштітучне.

У Хорватії, котра має 4,3 міліона жытелів, жыє приблизно 329 тісяч членів народностных меншын. Найвекшу ґрупу творять Сербы, котры за остатнім переписом представлюють штири процента цілковой популації. Русинів за остатнім переписом было нецілых 2000, і не мають окремого представителя у хорватьскім парламенті. Заступать їх член ромской народностной меншыны Велько Кайтазі, котрый довєдна заступать 12 народностных меншын.

Охорона прав меншын была єдным із условій приятя Хорватії до Европской унії у 2013-ім році.

Жрідло фотоґрафії: wc.de

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар