Голосник

В Ладомировій зреконштруовали церьков

0
Деревяна Ґрекокатолицька церьков св. Михаіла Архістратига в селі Ладомирова, окрес Свідник, перешла великов реконштрукційов, інформує словацька державна пресова аґентура TASR.

Церьков належыть меджі вісем деревяных храмів Карпатьского облука на Словакії, котры суть записаны до списку Світовой дідовизны UNESCO. Роботы на реконштрукції зачали іщі минувшый рік вымінов шындлів на пошкодженій стрісі.

Схосноване домашнє дерево

„Храм є вже практічно цілый оправленый. Каждых пять років є треба мінити пошкоджены шындлі. Старали сьме ся, жебы были якостны і жебы дерево походило із того краю. Много раз хоснують ся шындлі, котры не суть з краю, з котрого є церьков, і потім вытримлють короткый час,“ повів ґрекокатолицькый парох у Ладомировій Йосиф Гаврила. Як додав, даколи шындлі вырабляли ся ручно, днесь вже є то робота машын у фабриці.

За словами пароха бы было потрібне іщі натерти деревяный плот коло церькви, котрый є в добрім стані, но утримовати го треба. По часі ся може пошкодити, но покля ся натре, буде в порядку, пояснив про аґентуру Гаврила.

Храм із 18-го столітя з трьома дзвонами

Деревяна церьков у Ладомировій была збудована у 1742-і році.

„Коло храму є збудована і велика дзвініця, в котрій суть три дзвоны. Найвекшый дзвін є названый по св. Михаілови Архістратигови і є з року 1742, другый середній дзвін є названый по св. Петрови, є із 1927-го року, і найменшый дзвін є з єднакого року і має мено св. Павла,“ інформовав містный парох.

Доповнив, же рарітов той церькви є деревяный іконостас, котрый быв звудованый в першій половині 18-го столітя. Має пять шорів і належыть меджі найкрасшы на Словакії. Цілкову реконштрукцію церькви підпорило Міністерство културы Словацькой републікы в рамках проґраму Обновме собі свій дім (Obnovme si svoj dom).

Жрідло фотоґрафії: ttstudio.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар