Голосник

В липци поломництва на Гору Явір

0
Традицийно, каждый рік в місяци липци/юлию одбудут ся поломництва на Святу Гору Явір. Найперше зо своім поломництвом до святого місця Лемковины путувати будут вірны православной Церкви. Такой о нецілый тыжден по ним зачне ся поломництво грекокатоликів, котры того рока путувати будут не лем по Лемковині, але перейдут тіж по Пряшівскій Руси.

Православны од років путуют на Гору Явір на праздник свв. Апостолів Петра і Павла. Свято, якого дата то 12. липця/юлия, того рока выходит в пятницю. Братство Православной Молодежы Перемышльско-Ґорлицкой Єпархіі уж котрысый рік просит до спільного поломництва – не лем єпархіяльну молодіж і дорослых, але тіж вірных з інчых єпархій ПАПЦ, аж і другых Церкви. Буде то уж 29. православне поломницво на праздник свв. Петра і Павла.

Тогорічна едиция зачне ся в Ґорлицях стрічом і молитвом в катедральній церкви св. Тройці. Поломникы з Ґорлиц підут до Білянкы, а дальше на вечер зайдут до Устя Руского, де зорґанізуваный буде першый нічліг. В Устю, окрем спочынку, одбуде ся стріча з духовныма, котра буде не лем нагодом на выслуханя доповіди на реліґійну тему, але тіж нагодом давати часто нелегкы звіданя тыкаючы нашой віры і проблемів штоденного жытя.

На другій ден, поломникы перейдут до Ганчовы, де в місцевій церкви Покровы Пресятой Богородиці вечером служена буде Всеночна. В праздник свв. Петра і Павла поломникы підут путьом з Ганчовы до Высовы, де при місцевій церкви будут витаны єрархы. Наперед Божеской Літургіі буде посвячена вода і крест од православной молодежы. Богослужыня пройдут на ділянці належній ПАПЦ, під розставленым шатром. Записы і контакт до орґанізаторів чытайте на залученым афішы.

Вірны грекокатолицкой Церкви тот рік своє поломництво зачнут в середу, 17. липця/юлия, од ранного богослужыня в креницкій церкви свв. Апостолів Петра і Павла. По службі поломникы підут до Баниці, через Мохначку і Чырну. Там на вечер зрыхтуваный буде для охочых нігліг. Другого дня поломникы выйдут через Ізбы на Пряшівску Русь.

В першым приграничным русиньскым селі Фричці одправлена буде в місцевій грекокатолицкій святыни Служба Вожа. Дальше, через Петрову, Ґабольтів поломникы зайдут під Гору Явір од полудньовой страны, од села Циґелька. В селі орґанізуваный буде другій нічліг.

В ден понтифікальной літургіі на Св. Горі Явір, в пятницю, 19. липця/юлия, грекокатолицкы вірны выйдут з підрграничого села на яворовый верх, де о 9.30 год. чытаный буде Молебен до Пресвятой Богородиці, а внет по ним архієрейска літургія. Богослужыня пройдут в належній грекокатолицкій Церкви каплици Покровы Пресвятой Богородиці. Деталі про грекокатолицкє поломництво чытати мож на сайті www.gora-jawor.pl, якій веденый єст м.ін. в лемківскым языку о. Григорийом Пацаном.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар