Голосник

В Мадярьску знова Русины підуть ку чудотворній іконі

І тот рік ґрекокатолицькы Русины в Мадярьску будуть праздновати свій Русиньскый одпуст. Ку Чудотворній павловскій іконі Пресвятой Богородіці підуть 7-го септембра 2019-го року.

Русиньскый одпуст в Мадярьску є шторічнов подійов. Одбывать ся в селі Шайовпалфала (даколи мало славяньску назву Павлово), котре находить ся в Боршодьско-абовско-земпліньскій жупі в окресі Мішколц.

Одпуст з участьов метрополіты

Русиньскый одпуст окрім парохії орґанізує містне Русинське самосправованя в Шайовпалфалі вєдно із Вседержавным русиньскым самосправованьом і далшыма русиньскыма самосправованями по цілім Мадярьску. Тот рік підтримала подію і Канцеларія премєр-міністра Мадярьска.

Головным служытельом одпустовой літурґії буде Його Преосвященство Філіп (Кочіш), архієпіскоп гайдудорозькый і метрополіта Мадярьска. Участный буде і владыка Атаназ (Орос), єпарха мішколцьскый. Як орґанізаторы інформують, Русинів на одпусті поздоровить і Міклош Шолтес, державный секретарь з вопросів реліґійных і націоналных звязків Канцеларії премєр-міністра.

Традічне путованя ку чудотворній іконі

Ґрекокатолицька парохія в Шайовпалфалі, де ся каждым роком стрічать на одпусті русиньска комуніта, находить ся лем 11 км од Мішколца. До історії записала ся тым, же там слызыла ікона Пресвятой Богородіці.

В містнім храмі од праздника Рождества, за старым календарьом, аж до 16-го януара 1717-го року, слызыла ікона, котра была на престолі. Зачало то почас літурґії в першый день праздника Рождества. Кроніка споминать, же была барз туга зима і в такій зимі капкы слыз темночервеной фарбы не замерзали, ани не сохли, хоць ікону поставили на цілу ніч коло пеца.

Ікону пізніше скрыла римокатолицька церьков в місті Яґер. Ґрекокатолици  – священици і єпіскопы много раз просили, жебы їм ікона была вернута, но зістали без одповіді довгых 265 років. Аж 25-го октобра 1973-го року была ікона вернута до храму в селі. Веце о історії чудотворной іконы мож дочітати ся ту.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі