Голосник

В Меджілабірцях припомянуть собі 1. Світовый конґрес Русинів

0
Світова рада Русинів вєдно із Русиньсков обродов на Словеньску і містом Меджілабірці дня 23-го марца 2019-го року орґанізують в Меджілабірцях святочну академію, котров собі припомянеме 28-му річніцю од 1-го Світового конґресу Русинів. Тот проходив у тім місті 22-го і 23-го марца 1991-го року.

На академії бы за інформаціями, котры редакції дав председа Русиньской оброды на Словенську Мартін Караш, мали брати участь представителі Світового конґресу Русинів із векшыны членьскых держав.

Коло памятной таблы і на Містьскім уряді

Офіціална часть проґраму зачінать о третій пополідне презентаційов участників. Далше є напланованый сімболічный акт коло памятной таблы, котра є на Културнім домі в Меджілабірцях (будова, в котрій є і Музей модерного уменя Енді Варгола). Як раз то было місце, котре стало сценов того вызначного історічного пункту в русиньскім народнім возроджіню по 1989-ім році. На тім місці має приговорити ся председа Світового конґресу Русинів Штефан Лявинець, як і єден із участників конґресу із 1991-го року.

Од пів пятой має академія продовжовати в просторах Містьского уряду в Меджілабірцях. Тоту часть буде одкрывати Андрій Копча. З рефератом під назвов Русины світа до участных зверне ся председа конґресу Штефан Лявинець, далше буде слово належати пріматорови міста Меджілабірці Владіславови Вышньовскому, котрый Русинів поздровить своїм приговором. Выступати на академії має і Мартін Караш, підпредседа Світовой рады Русинів і председа Русиньской оброды, котра тот рік орґанізує Світовый конґрес Русинів знова на Словакії.

Участны годны будуть видіти і выставку під назвов Русиньскы діятелі меджівойнового періоду. Ньов закнічіть ся святочна часть, по котрій буде іщі слідовати засіданя Світовой рады Русинів.

Дата першого конґресу є Світовім дньом Русинів

Дні  22-ый і 23-ій марец 1991-го року записали ся до історії Русинів цілого світа. 1-ый Світовый конґрес Русинів, котрый проходив у Меджілабірцях, быв подійов, на котрій ся першыраз зышли Русины з різных країн Европы і Северной Америкы на своїм світовім форумі. У тій новій демократічній сітуації собі Русины наповно усвідомили свою позіцію як єдного із многых европскых славяньскых народів. Вырішуючім у тім процесі возроджованя Русинів было основне властне пересвідчіня, правдива арґументація історічных фактів, потребна давка толеранції і безгранічна терпезливость при здобываню своїх прав.

На 1-ім Світовім конґресі Русинів быв делеґатами за першого председу Світовой рады Русинів зволеный Василь Турок-Гетеш, втогдышній председа Русиньской оброды, котрый на челі СКР стояв цілых десять років.

На остатнім Світовім конґресі Русинів, котрый проходив од 29-го юна до 2-го юла 2017-го року в хорватьскім Осієку, было вырішено, же 23-ій марец буде шторік святковати ся як Світовый день Русинів.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар