Голосник

В Меджілабірцях просять о фінанції на оправу церькви

Православна Церьков Святого Духа є домінантов міста. Стоїть на бережку коло центра міста і так каждый, хто переходить через Меджілабірці, збачіть храм збудованый в староруськім штілі.

Православны вірникы в тій церькви реґуларно мають свої богослужіня од зачатку 1990-ых років. Як раз в тых роках робила ся і внутрішня обнова храму, кедь быв зробленый розпис на стінах. Теперь парохія просить о фінанчну поміч на обнову стріхы і купол.

Просьте, і дістанете…

Як інформує у писмі зо жадостьов і фінанчну поміч Александер Залевскый, котрый є священиком у Меджілабірцях, парохія вже здобыла грошы од Міністерства фінанцій Словацькой републікы на фасаду храму.

Но при оглядці пришло ся на то, же суть барз пошкоджены куполы храму (бані), прикрытя стріхы і деревяны конштрукції стріхы. З тыма справами ся не дасть чекати і вшытко треба комплетно вычеряти, што выжадує немалы фінанції.

„Зато в дусі Євангелійовых слов: ‚Просьте, і дістанете, клопкайте і отворять Вам…,‘ просиме Вас о фінанчну підпору, жебы сьме могли тоту реконштрукцію комплетно зреалізовати,“ пише отець Залевскый. Вшыткы, котры бы хотіли і годны были фінанчно підпорити обнову лабірьской церькви, можуть свої дары посылати на банковый рахунок SK 18 0200 0000 0012 7741 0859.

Храм Святого Духа в Меджілабірцях

Церьков Святого Духа в Меджілабірцях є културнов памятков і была збудована у 1949-ім році. Із благословліньом втогдышнього архієпіскопа Єлевферія із дня 5-го юла 1947-го року храм зачав будовати втогдышній православный духовный Николай Щербей.

Будованя не было просте, бо быв недостаток матеріалу і фінанцій. Наконець ся ставба могла зреалізовати вдяка підтримці втогдышнього міністра обороны Чехословацькой републікы, пізнішого презідента ґенерала Людвіка Свободы. Поміг го будовати як памятник павшым воякам у обидвох світовых войнах. Зато має храм і назву Памятник павшых героїв – Славянів, Першой і Другой світовой войны.

Церьков была зроблена в староруськім ренесанчнім штілі. Проекты робив архімандріта Андрій Коломацькый, котрый і вів роботы на ставбі. Тот мав у тім часі вже богаты скушености з будованьом церьквей на Чехах, на Мораві і на Підкарпатьскій Руси.

Великов змінов перешла церьков у 1990-ых роках, коли быв зробленый комплетный розпис ікон на стінах. Робив го головно іконописець ґреческого походжіня Дімітріос Леуссіс, жыючій в Споєных штатах Америкы. Роботы тырвали штири рокы. Резултатом є 350 ікона на 1600 квадратных метрах стін церькви.

Жрідла фотоґрафій: Jana Mončeková, Jano Štovka – OLIVIERproduction.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі