В Мукачеві передано премію ім. Александра Духновича

Днес рано місто Мукачево признало мійску премію ім. Александра Духновича. Серед нагородженых нашли ся особы знаны в русиньскій обшыри, такы як лідер русиньской музычной ґрупы Рокаш/Rock-H – Віктор Янцьо, та скульптор Іван Бровдій.

В рамках преміі выявлено шіст катеґорий, в якых выбрано по єдній особі, котру нагороджено. Лідер підкарпатского ансамблю Рокаш, Віктор Янцьо, переміг в номінациі «музычно-выконавче мистецтво». Ґрупа Рокаш явит ся выконавцьом деякых русиньскых співанок в модерным роковым жанрі, заєдно заховуючы типовы підкарпатскы приметы співу. Ансамбль концертувал в 2014 р. серед Русинів в Польщы, вчас Лемківской Ватры на Чужыні. Віктор Янцьо про наше радийо товды повіл, же пише ся Русином і знат бесідувати в рідным языку. В мукачівскій преміі ім. Духновича Янцьо был нагороджений за послідній альбом ґрупы Рокаш – «Співаночкы про любов» (2016 р.). Серед нагородженых нашол ся тіж русиньскій скульптор Іван Бровдій, котрий был номінуваний в катеґориі «образотворче та декоративно-прикладне мистецтво». Бровдійому премію признано за скульптуру «Ром-двірник».

Нова премія схвалена Мукачевом

Премія ім. Александра Духновича – народного будителя Русинів – была про Мукачево схвалена в грудни/децембрі 2016 р. Днешнє розданя явит ся першом того рода подійом. Ціна Духновича была встановлена за справом голосуваня Мійской Рады Мукачево. В постанові рады з грудня/децембра влонишнього рока, пн. «Положення про Мукачівьску міську премію імені Олександра Духновича», чытаме м.ін., же нагороду ім. Александра Духновича – […] письменника, педагога, просвітителя, культурного діячазапроваджується на честь одного з найбільш визначних представників культурно-освітнього руху Закарпаття середини ХІХ століття. Тогорічний фонд преміі то 240 тисячы гривен. Як інформувала Мійска Рада Мукачево на своім офіцийным інтернетовым сайті, ціна ім. Александра Духновича є на рівни з нацийональном премійом ім. Т. Г. Шевченка, єдном з найбільшых мистецкых премій в Украіні.

Премія выдавана К-РНЦ была перша 

Премія ім. Духновича, яку рішыло передавати місто Мукачево, неє першом так названом нагородом. Премію під меном русиньского будителя уж пару років признає Карпато-Русиньскій Науковий Центр, а фінансує ю Штефан Чепа з Торонта. Є то ціна, яку рік-річні признає ся за найліпшу книжку з обшыри русиньской літературы підчас Літературного Вечера орґанізуваного Пряшівскым Університетом. Побідитель отримує до рук 1000 дулярів та бронзову скульптуру карпатского медведя. Лавреатами нагороды в обшыри русиньской літературы до той поры были м.ін. Василь Ябур, Штефан Смолей, Юрий Харитун, Мария Мальцовска, Людмила Шандальова ци Петро Мурянка і Олена Дуць-Файфер.

фот. фанпейдж Мійской Рады Мукачево – Фб 

 

 

 

 

Вісти

Про автора

Севериян Косовскый
Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар