Голосник

В Новоселиці збудовали притулок про турістів

0
Як інформовала словацька державна пресова аґентура TASR, в селі Новоселиця, окрес Снина, прибыв новый притулок про турістів. Село є частьов Народного парку Полонины і притулок быв збудованый в містній части Поляна, котра є на дразі ку Медовій бабі.

Притулок тіпу алпінка має розміры приблизно 3 на 4,5 метра. Внутрі не суть жадны меблі, може ся там выспати понад десять людей.

Місце на переночованя із дотації

Новый притулок про турсітів збудовали сільскы робітници. Село на обєкт здобыло дотацію 5000 евр із Енвіроменталного фонду в рамках Проґраму обновы села. 300 евр дала Новоселиця як властны жрідла.

Турісты тото місце, як повів про аґентуру староста Новоселиці Василь Дініч, хосновали і дотеперь. Кедь перед штирьома роками демонтовали автобусовы заставкы в селі, єдну із старых бляшаных вывезли на Поляну. Служыла турістам в припаді планой погоды, жебы мали де скрыти ся. І зато в селі вырішыли збудовати деревяный обєкт. Навчівници мають коло нього ку діспозіції лавкы і стіл, єднако як і огниско. Находить ся там і мале озеро.

Пята алпінка

Навчівници Народного парку Полонины можути переночовати і в далшых штирьох подобных притулках, котры находять ся на трасі турістічной стежкы, яка має приблизно 50 кілометрів.

Стежка веде із Осадного аж по Кременець, котрый має вышку 1 210 метрів над морьом. На тім верьху стрічать ся словацько-польско-україньска граніця. Алпінкы можуть турісты найти в седлі під Чертяжов, далшы дві суть в селах Рунина і Збой, єдна находить ся в Руськім седлі.

Жрідло фотоґрафії: TASR.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар