Голосник

В Новым Саді вчат предшкільны діти по русиньскы

0

В Новым Саді, в Сербіі, вчат діти рідного языка од малого. В новым шкільным році 2016/17 буде продолжана наука русиньского языка в єдным з предшколів, до котрого ходят і нашы діти. Наука буде полігала на занятях достосуваных до вікового розвитку чловека, т.є. кладений буде тиск на бесідувано-образковы активности. Вечерня школа русиньского языка про наймолодшых буде ведена в кажду середу медже 18.00 год. а 19.00 год. Вчыня русиньского языка в предшколи в Новым Саді є орґанізоване в рамках проєкту «Учиме руски язик». Дружство за русиньскій язык, літературу та культуру, котре старат ся про орґанізацию пункту вчыня діти рідного языка, кличе родичів посылати своі отрочата на вечернє предшколя русиньского языка. Заінтересуваных родичів одсыламе за деталями до того мотузка.

Вчыня рідного языка од наймолодшых років, гейбы може принести найбільший хосен. На Лемковині та серед лемківской діаспоры в Польщы доднес не сут орґанізуваны того рода професийональны плятформы, де бы предшкільны діти мали нагоду запознавати ся з рідным лемківскым языком (деяка неформальна ґрупа выступила в Пшемкові). Зато, для части першом стрічом з русиньскым є аж лекция в основній школі. Занятя в основных школах сут ведены в парох пунктах вчыня так на Лемковині, як і чужыні. Хоц сут то барз важны акценты в едукациі молодых Лемків, фурт насуват ся звіданя, ци не требало бы старати ся про гляданя розвязань, цілю орґанізуваня русиньскы предшколя на Лемковні, хоцкы в вечернім трибі. За тым Лемковина могла бы смотрити не лем на Сербію, але головно на Пряшівску Русь, де в нормальным трибі одбывают ся занятя для предшкільных діти. Такы школы находят ся на русиньскы селах, довєдна Матерска школа з основном. Надійме ся, же і в нас скоро такє приде.

інфо. за: Рутенпрес

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар