В Пряшові буде семінарь о Бескидови і школстві. До Кошыць прийде Барвінок

В першій половині новембра русиньскы орґанізації в Пряшові і в Кошыцях орґанізують три інтересны події. На своє собі в Пряшові прийдуть любителі історії, в Кошыцях любителі фолклору.

Русиньске културно-освітнє общество Александра Духновіча в Пряшові орґанізує дня 8-го новембра 2016-го року науковый семінарь, котрый буде присвяченый особности Антонія Бескида (1855 – 1933), русиньского політічного діятеля, другого ґубернатора Підкарпатьской Руси в складі 1-ой Чехословацькой републікы. Семінарь зачінать о 15.00 год. в просторах Словацького народного музею – Музею русиньской културы на Масаріковій уліці ч. 20 в Пряшові.

В тот самый день Русиньске културно-освітнє общество Александра Духновіча од 16.00 год. буде продовжовати свій проґрам науковым семінарьом на тему Русиньске школство за 1-ой Чехословацькой републікы до українізації.

Містна орґанізація Русиньской оброды на Словеньску в Кошыцях приготовила културну подію на 13-го новембра 2016-го року. В тот день до Кошыць завитать Фолклорный колектів Барвінок із села Камюнка, котрый ся представить із проґрамом під назвов Із русиньского сердця (Потішме ся з Барвінком). Подія одбуде ся в Културно-сполоченьскім центрі Южан на Сметановій уліці ч. 4 в Кошыцях і зачінать о 16.00 год.

Вступ на спомянуты події є бесплатный. Сердечно запрошаме.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Культура

Про автора

Петро Медвідь
Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год.

Коментар