Голосник

В пятніцю ТАД одпремєрує приповідку Медовникова хыжка

0
В пятніцю 29-го марца 2019-го року русиньскый Театер Александра Духновіча в Пряшові на Великій сцені опдремєрує нову приповідкову пєсу під назвов Медовникова хыжка.

На знечіщіня природы і потребу сепарації смітя має вказати нова пєса про діти в репертоарі театру, котру режіровав Михаел Віскочаній, і котра є зроблена на основі класічной приповідкы братів Ґріммовых.

Приповідка братів Ґріммовых у властній верзії

„Были сьме на обробліня тітулу Медовникова хыжка ословлены прямо театром,“ повіла про словацьку державну пресову аґентуру TASR Ленка Ґарайова, котра є драматурґічков новой пєсы.

„Самособов сьме з тым были согласны, бо тота приповідка є знама, добра, думам, же єй діти реґіструють. Є то такый приповідковый evergreen. Акурат сьме роздумовали над тым, котру із різных верзій схосновати і дішли сьме до того, же найпростіше буде зробити собі нову, властну верзію, котра буде комбінаційов дакотрых елеменітв і мотівів з веце верзій оріґіналной приповідкы написаной братами Ґріммовыма,“ продвжовала Ґарайова.

До дії інсценаторы закомпоновали роль совы Соні як природного елементу, котрый має помочі дітям в тяжкій сітуації, коли закрочіть. Окрім того, як повіла ґраматурґічка, є сова Соня носительков барз актуалной темы сепарації смітя і знечіщованя природы.

„Думаме собі, же є про діти барз основным то з нима рішыти і комуніковати, бо тоты еколоґічны темы абсолутно діставають ся меджі пріоріты. Значіть совічка є звірятко, котре ся скаржыть на то, же природа є знечіщена, сепарує смітя і має намагу навчіти то і діти,“ пояснила думку пєсы драматурґічка пєсы.

Не треба підціньовати дітячу публіку

Режісер пєсы Віскочаній твердить, же дітячу публіку не треба підціньовати.

„Памятам собі приповідкы зо свого дітинства. Досправды многы твроцьове з дітей робиять як кебы дураків. Зроблять ню-ню-ню і то як кебы старчіло. Приповідкы втогды про мене як кебы не мали далшый план, чом бы мали заінтересовати. Была то лем скорочена, розповідана історія,“ повів режісер. Єдночасно думать, же бы сьме діти не мали вчіти бісідовати даякым „чудным, новым, марсіяньскым языком. Они суть хытры, мысель дітины є барз позорна на імпулзы,“ повів.

Співрацу режісер спринимать позітівно

Співпрацу з Театром Александра Духновіча Віскочаній спринимать барз позітівно, іншпіратівно і забавно. За його словами є драматічный колектів русиньского театру барз талентованый. Єдночасно ся подля нього взаємно решпектують молодшы і старшы акторы.

І у пєсі дав можливость обидвом ґенераціям. Роль Янка приділив Ладіславови Ладомирякови, котрый ся алтернує із Мартіном Оравцом, другу головну роль Марькы грають в алтернації Зденка Кваскова і Івета Фейкова. Отця собі заграть Йосиф Пантликаш, котрый ся буде черяти з Любоміром Міндошом. Людмилу Лукачікову буде мож в новій приповідці видіти як мачоху, Бабу-Яґу грає Василь Русиняк і сову Соню Ярослава Сисакова.

Премєра Медовниковой хыжкы є в пятніцю 29-го марца о 17.00 год. на Великій сцені ТАД, другу премєру мож видіти уж в неділю 31-го марца о 16.00 год.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар