Голосник

В рамках выставы «Енді Варголь: загыбаючы виды звірят» – днес в Ню Йорку фільм о коренях короля поп-арту

0
7. жолтня/октобра 2018 р., в Украіньскым Музею в Ню Йорку была одкрыта выстава выдатного артисты русиньского походжыня – іконы поп-арту – Енді Варголя, на яку складат ся десят ґрафік з сериі «Енді Варголь: загыбаючы виды звірят», котры походят з 1983 рока. Днес в нюйоркскым музею дальшы акциі в рамках той выставы.

Єдна з части вказуваных на вернісажы прац посвячена была молодым рокам артисты з Пітсбурґа, де ховал ся в карпаторусиньскым середовиску, а тото же влияло на його еволюцию і дорогу до бытя знаным світовым артистом. Зато і при експозициі зо славном серийом звірят презентуваны сут тіж творы Варголя з молодого періоду його творіня, ґу котрым придано деякы приватны артефакты і родинны фотоґрафіі. Серия з жывином здає ся перечыти опініі, же артиста был беземоцийный, вывысшувал лем консумпцию і комерцию, понеже в тым примірі похылят ся над тяжкым положыньом дакотрых видів звірят, што мало звернути увагу світа на іх загыбаючы ґрупы. Тото і вказує, же діапазон його творчости был о вельо шыршый, сігал далеко-дальше як поп-арт, ци загальні малярство, прібуючы припомнути тіж вшыткым людям, захопленым його творчістю, же не лем они єдны жыют на тым світі.

При нагоді выставы «Енді Варголь: загыбаючы виды звірят», єй орґанізаторы заплянували і другы акциі. Днес в просторах Украіньского Музею в Ню Йорку о 14.00 год. буде вказуваный документальный фільм в режысериі Станіслава Мухы «Absolut Warhola», котрый для сподіваных гости заповіданый єст дост нестандардово, але цікаво:

Незалежні од того, што сте може і чули, Енді Варголь одкальси мусіл прити. Як знате, він родженый і выріс в Пітсбурґу, але його корені сігают дальше і глубійше, як його молоды рокы в Америці. Обоі його родичы были карпаторусиньскыма іміґрантами, якы приіхали з села в Східній Европі, котре днес находит ся в границях Словациі. Режысер фільму іде на Словацию, жебы найти і побесідувати з членами родины Варголя, котры там остали, вказуючы при тым музей, основаный на чест артисты.

Режысер Станіслав Муха по дорозі минят Русинів, Циґанів, Словаків, што чути по хоснуваным респондентами языку, звідуючы іх, як доіхати до Миковой, одкале походит король поп-арту. При нагоді прібує ся дознати, ци місцевы, жыючы там люде, дашто знают о своім родаку. Тым способом трафлят до рідного села Варголя, де конец-кінцьом стрічат його родину і зо стороны Варголів, і зо стороны Завадскых. Там ся дознає, же аж по смерти выдатного артисты близкы ліпше познали, чым ся досправды занимал Енді, або як о ним повідают – Андрийко, хоц даякій конакт зо собом мали, кєд же высылал ім Енді з Америкы дарункы – червены і зелены парадны черевікы, або облечыня. Режысер іде і до Меджелабірців, до Музею Модерной Штукы Енді Варголя, де його директор, др. Михал Быцко, вказує вельо артефактів, звязаных з артистом, бесідує о його жытю. Не встиг Енді Варголь прити до свойого рідного села, бо вмер в 1987 році, коли комунізм в тій части Европы здавал ся фурт быти нерушымым, хоц – як знаме – мриял о тым. Мусіл бы то быти для него великій шок, кєд же і в документальным фільмі, накрученым в 2001 р., видно, же то не найбогатша част – ани світа, ани товдышньой Словациі.

Постер фільму Absolut Warhola. Автор: Mieczysław Górowski

Выстава «Енді Варголь: загыбаючы виды звірят», котра присвячена єст 90. річници народин артисты (1928-1987), буде вказувана Украіньскым Музейом в Ню Йорку до 17. лютого/фебруара 2019 рока і закінчыт ся дискусийным панельом пн. «Енді Варголь і його карпаторусиньскы корені», в котрым возмут участ м.ін знаны русиньскы дослідникы проф. Павел Роберт Маґочій і проф. Елейн Русинко. Іщы перед тым, в суботу 9. лютого/фебруара 2019 рока, в рамках музично-поетичной ночы выступлят поеты, співакы, композиторы і інструменталисты.

Шеруй.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментар