Голосник

В русиньскім окресі засідала словацька влада. Схвалила про нього міліон евр

0
3-го юла 2018-го року проходило выїздове засіданя влады Словацькой републікы в Меджілабірцях. Місто є центром окресу, котрый за офіціалныма даныма із перепису населіня, котрый проходив у 2011-го році, найвеце русиньскый. Ку Русинам ся в нім приголосило понад 60 процент жытелів.
Міліон евр про окрес

На засіданя до Меджілаборець пришла ціла влада. Премєр Петер Пеллеґріні (Smer-SD) зо своїм кабінетом розділив почас засіданя міліон евр із бюджетовой резервы про окрес Меджілабірці, котрый належыть меджі найменше розвиты реґіоны Словакії. До 2022-го року бы в рамках акчного плану окресу Меджілабірці, котрого головным цільом є знижыти безробітность, мало выникнути 377 робочіх місць, і то прямованьом актівностей до областей економікы, освіты і служеб. Черьпаная фінанцій із реґіоналной дотації бы мало быти простіше, што оголосив підпредседа влады про інвестіції і інформатізацію Ріхард Раші іщі перед віторковым засіданьом.

Підпора народностного школства і културы

„Народностны меншыны творять неодділительну часть жытельства Словакії і їх културу є потрібне в інтересі цілой нашой шполочности хоронити і всокотити. Реґіон, котрый єм днесь навщівив, є домовом многых Русинів. Зато єм актуално на їднаню влады одкрыв вопрос підпоры културы і освіты як раз той меншыны – словацькых Русинів,“ написав на соціалній сіті Facebook Ґабор Ґал, міністер справедливости (Most-Híd).

Влада по віторковім засіданю планує підпорити народностне школство. Дотулять ся то і малокласных школ.

„Прияли сьме і політіку, же наперек тому, жебы собі ефектівіта жадала дакотры малокласны школы заперати і радше дати дітям якостніше навчаня в повноорґанізованых школах, буде далше платити, же там, де іде о освіту в языку народностной меншыны, не будеме смотрити на економіку, але на право, жебы каждому, хто ся хоче у своїм меншыновім языку учіти, было му тото право забезпечене,“ повів у віторок новинарям председа влады Пеллеґріні.

Пеллеґірні навщівив і Музей модерного уменя Енді Варгола, котрму на соціалній сіті Facebook так само приобіцяв поміч.

„Суть лем дві місця на світі, котры так давають честь найзнамішому представительови поп-арту Енді Варголови. В США і Меджілабірцях. Зато зробиме з міністром фінанцій Петром Кажіміром вшытко, што в нашых силах, жебы тот музей гордо репрезентовав Словакію. Найдеме грошы на оправу будовы і інтерьєру, жебы його образы іщі довго обдивовали навщивници з цілого світа,“ написав премєр.

„Най“ з окресу Меджілабірці

Окрес Меджілабірці має найнижшу кількость жытелів на Словакії. Довєдна їх є дашто понад 12 тісяч, із того приблизно 6 600 жыє в окреснім місті. Довгодобо має єдно з найвысшых чісел безробітности. Ку фебруару то было коло 12,62 процента. В окресі є зато высоке чісло міґрації за роботов. Коло 5,8 процента людей одходить за роботов за граніці Словакії.

Єдночасно є то і окрес із найвысшым чіслом жытельства попродуктівного віку в рамках Пряшівского краю, і є то окрес з найстаршым середнім чіслом віку населіня – 42,1 років.

Жрідло фотоґрафії: Peter Pellegrini.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар