Голосник

В Руськім Керестурі інтронізовали першого єпарху

0
В неділю 19-го мая 2019-го року быв у Руськім Керестурі в Сербії торжественно інтронізованый першый єпарха Ґрекокатолицькой єпархії св. Николая владыка Ґеорґій (Джуджар). Єпархія была еріґована 6-го децембра 2018-го року декретом Папы римского Франціска.

Інторнізація єпархы проходила за участи кардінала Леонарда Сандрі – префекта Конґреґації про восточны церькви, архієпіскопа Лучіана Суріані – апостольского нунція в Сербії, двадцятьох епіскопів і дакілько десяток священиків із пятнадцятьох держав. Меджі єпіскопами были і владыка Мілан (Шашік) – мукачівскый єпарха із своїм помічным єпіскопом Нілом (Лущаком), пряшівскый ахієпіскоп і метрополіта Йоан (Бабяк), кошыцькый єпарха Мілан (Хаутур) ці ніредьгазьскый владыка Авел (Сочка).

Выдали Старый завіт по русиньскы

Празднованя офіціалного зачатку урядованя нового єпарху і єпархії зачало вже в суботу 18-го мая, коли владыка Ґеорґій одслужыв у Церькви свв. апостолів Петра і Павла в Новім Саді вечурню, по котрій слідовав далшый проґрам.

Владыка Ґеорґій в суботу інформовав, же із нагоды выголошіня новой єпархії вышов друком історічно першый русиньскый переклад Старого завіта в містній верзії русиньского языка. Тот переклад робив професор Новосадьской універзіты Янко Рамач і писатель Михайло Рамач. Папа римскый Франціск нагородив перекладателів Орденом рыцарів папы Сілвестра. Орден їм в суботу вручав папскый прелат кардінал Леонардо Сандрі.

Інтронізація

В неділю вже торжество перенесло ся до Руського Керестура, центру єпархії. Архієрейска літурґія зачала о 10.00 год. дополідне в Катедралнім соборі св. отця Николая. Вєдно з новым єпархом єй служыли кардінал Сандрі і архієпіскоп Суріані. На літурґії співав Ужгородьскый Катедралный хор імени Теодора Ромжы і домашній Катедралный хор св. отця Николая.

Окрім спомянутой церьковной єрархії брали на інтронізації участь монахы і монахыні різных чінів, представителі сербскых властей – републіковых і самосправных, представителі публічного і културного жывота як і множество вірників із вшыткых парохій єпархії.

Новый єпарха Ґероґій почас свойой інтронізації нагородив сім своїх священиків тітулом ставрофорного протоєрея. Кардінал Сандрі, котрый в рамках проповіді прочітав поздравны слова од Папы римского Франціска, выразив велике задоволіня, же быв участным той історічной події містной церькви.

Історія новой єпархії

Єпархія св. Николая в Руськім Керестурі выникла із Апстольского екзархату про вірників візантійского обряду в Сербії і Чорній Горі. Тот выникнув у 2003-ім році, по роспаді Югославії, коли быв вынятый із Крижевацькой ґрекокатолицькой єпархії. Крижевацька єпархія до 2001-го року мала під собов вшыткых ґрекокатоликів на теріторіях бывшой Югославії.

Од 2013-го року змінила ся назва екзархату на Апостольскый екзархат у Сербії. Катедралным собором од 2003-го року є Церьков св. Николая в Руськім Керестурі, котрый є і головным центром войводиньскых Русинів. Нова єпархія має 21 парохій і коло 22 тісяч віруючіх. Вірниками новой єпархії суть головно Русины, но мож меджі нима найти і Хорватів ці Румунів. Адміністрація єпархії є в Новім Саді, де была і адміністрація екзархату.

Владыка Ґеорґій Джуджар

Першый єпарха Єпархії св. Николая владыка Ґеорґій народив ся у 1954-ім році в Дюрдьові, на теріторії днешньой Сербії. Середню освіту в малій семінарії здобыв у Римі, потім там далше продовжовав у філозофічно-богословскых штудіях. У 1985-ім році здобыв у Римі докторат із востночного канонічного права.

Рукоположеный на священика быв у 1980-ім році як священик Крижевацькой єпархії. 15 років робив на Конґреґації про восточны церькви в Римі. У 2001-ім році быв призначеный епіскопом – помічником Мукачівской ґрекокатолицькой єпархії і рукоположыв го на єпіскопа Папа римскый Йоан Павел ІІ. По заснованю екзархату в Сербії у 2003-ім році став його першым екзархом. 6-го децембра 2018-го року быв выменованый за першого єпарху нововыникнутой єпархії.

Жрідла фотоґрафій: Рутенпрес, Греко-Католицьке Закарпаття

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар