Голосник

В січни першы змаганя в рамках турніру Rusyn Cup

0
В січни/януарі 2019 р. зачнут ся першы змаганя в рамках VI едициі футбольового турніру Rusyn Cup, якій што рік проходит в поєдных містах Словациі, а од влони тіж серед войводиньскых Русинів.

В рамках кваліфікацийных змагань розограны будут штырі турніры в січни/януарі і пак єден початком лютого/фебруара. Першы кваліфікациі пройдут 12. січня/януара паралельно в столичным місті Братислава і в Старій Любовни. О ден, 13. січня/януара змаганя розограны мают быти во Свиднику. Тыжден пізнійше, 19. січня/януара участникы округовых змагань будут міряти силы в Михалівцях.

Новом формом, яка започаткувана была влони, сут змаганя і серед войводиньскых Русинів. Перша проба турніру в Войводині вказала ся успішном, прото і тым разом, 2. лютого/фебурара, в Рускым Керестурі бороти ся будут комадны тамтышніх родаків, якы пак авансуют до дальшых етапів Rusyn Cup.

Як што рік турнір поділений є на поєдны кваліфікацийны змаганя в ґрупах, пак слідуючо на чвертфіналы, пілфіналы і конечно великій фінал, якій розограний буде в Братиславі.

Турнір направлений єст на Русинів в ріжным віку. Вымогом є, жебы команды рахували 5-9 грачів. До єдной кваліфікацийной розгрывкы може приголосити ся максимально 8 команд, спосеред котрых переможці підут до дальшых части Rusyn Cup.

Турнір, за орґанізацию котрого одповідат общесто молоды.Русины, з рока на рік робит ся барже популярний. Доказом того є тото, же змаганя проходят і поза границями Словациі. Каждого рока міняют ся міста, в котрых турнір ся одбыват. Все сут то такы місцевости, в якых прожыват русиньскє населіня або до якых за хлібом і освітом переносят ся родакы.

Окрем участників ждана є і публика, котра має свобідний вступ на вшыткы етапы турніру.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар