Голосник

В Стемфорді упамятнили жертвы акциі «Вісла» – фотореляция

Вчера, 2. жолтня/окторба, в Стемфорді (штат Коннектікет) в Зъєднаных Штатах Америкы проходил ден нацийональной памяти про жертвы акциі «Вісла» та ден памяти Лемків страдавшых в польскым комуністичным концентрацийным лаґрі в Явожні. 

Подія зачала ся од панихіды за жерты з 1947 рока, яка была одслужена о. Владиміром Горощаком (сыном Івана Горощака) в місцевій православній церкви Успіня Пресвятой Богородиці находячій ся в юрисдикциі Православной Церкви в Америці (анґ. OCA – Orthodox Church in America). Пак одчытано близко 500 назвиск Русинів з Лемковины, якы были поневолены в явожняньскым лаґрі. Як підкрисляют орґанізаторы, назвиска тоты были зобраны з сел цілой Лемковины – од західніх по східні єй крайці. 

По богослужыню і одчытаню назвиск на парохіяльным приходстві был запрезентуваний тогорічний документальний фільм про акцию «Вісла» – Аж і слезы не старчыли. Проєкция проходила при участи продуцентів і думкодавців проєкту, Мариі Сільвестрі і Джона Ріґетті. 

Подія была орґанізувана найстаршом лемківском орґанізацийом в ЗША – Лемко Союзом, під проводом дра Богдана Горбаля. 

фот. Мария Сільвестрі, Петро Косовскый 

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі