Голосник

В суботу «Лемківскє Літо»

0
Уж заран, 14. липця/юлия 2018 р., в Чмелю пройде «Лемківскє Літо», якє орґанізуване єст од парох років православном парохійом св. Тройці в Любіні. В проґрамі, котрий вказаний буде на спортовым пляци в центрі села, выступлят головно ансамблі презентуючы лемківскы выконаня.

«Лемківскє літо» мож сміло зараховувати до цикличных подій, котры орґанізує любіньска парохія. Стріча рік в рік притігат штораз більше чысло розметаных по чужыні родаків, якы вчас тырваючых концертів годны коштувати вшелеякых страв, хоснувати побічны акциі і гостити ся в приємній атмосфері. Тогорічна стріча в Чмелю буде уж семом, котрій окрем парохіі патронуют вєдно село Чмель, Уряд Міста Хоцянів ай Хоцянівскій Осередок Культуры. Подію спілфінансує Уряд Міста Любін.

На початок заранійшой стрічы о 15.00 год. на сцені лемківскій фольклор вызвучыт в выконаню ЛАПіТ Ластівочка. По них концерты продолжати будут з такыма ансамблями як Розтока з Рудной ци молодіжна, вроцлавска ґрупа н’лем фольк. Несподіванком будут выступліня новооснованых лемківскых ансамблів. З Ліґниці приде ґрупа школярів музычной школы, котры од деякого часу вчат ся выконувати лемківску музыку. Селяне выступлят з новопокликаным Лемківскым Музычным Ансамбльом з Чмеля. Гостити будут тіж заприязнены Собіняне з сусіднього Собіна (дав. Шронова).

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар